هەسەدە ناوی فەرماندە باڵاکانی بۆ تێکەڵبوون بە سوپای سووریا ڕادەستی ئەمەریکا دەکات

ئیرادە میدیا

قۆناغێکی نوێ لە سووریا؛ چاوەڕوان دەکرێت دیمەشق دان بەو هێزانەدا بنێت

بەپێی زانیارییە تایبەتەکان، هێزەکانی سووریاى دیموکرات (هەسەدە) هەنگاوێکی گرنگیان ناوە لە ئاراستەی یەکخستنی هێزەکانیان لەگەڵ سوپای فەرمیی سووریادا. هەسەدە لیستی ناوی ٧٠ بەرپرسی باڵای سەربازی و سەرجەم پێکهاتەی سێ فیرقەی سەربازیی سەرەکی (فیرقەی دێرەزوور، فیرقەی حەسەکە، فیرقەی ڕەققە)، هەروەها هەر سێ لیوا تایبەتەکە و هێزەکانی ناوخۆی ڕادەستی هێزەکانی ئەمەریکا کردووە.

تێکەڵکردن لە ڕێگەی واشنتۆنەوە

ئەم لیستە ڕادەستکراوە لەلایەن هێزەکانی ئەمەریکاوە گەیەنراوەتە بەرپرسانی هەردوو وەزارەتی بەرگری و ناوخۆی حکومەتی دیمەشق. مەبەست لەم هەنگاوە ئەوەیە کە دیمەشق ناچار بکرێت دان بە بوونی ئەم هێزانەدا بنێت، کە سەرجەمیان هەڵگری ناسنامەی سوورین، و لە ڕیزەکانی سوپا و وەزارەتی ناوخۆی حکومەتەکەدا جێیان بۆ بکرێتەوە.

بڵاوبوونەوەی ئەم هەواڵە، ئاماژەیە بۆ چاوەڕوانکراوێک کە دەسەڵاتی شەرعی لە سووریا ناچار بکرێت ئەم هێزانە وەک بەشێک لە سیستەمی بەرگریی نیشتمانی قبوڵ بکات.

ئاڵای زەرد و ئاڵای دەوڵەت

سەرکەوتنی ئەم هەنگاوە، دۆخی سەربازیی لە باکوور و ڕۆژهەڵاتی سووریا بەتەواوی دەگۆڕێت. ئەگەر پڕۆسەی یەکگرتنەوەکە بە سەرکەوتوویی جێبەجێ بکرێت، لەمەودوا ناوی هێزەکانی سووریاى دیموکرات (هەسەدە) نامێنێت، و یەکە سەربازییەکانیان شانبەشانی ئاڵا زەردەکەی خۆیان، ئاڵای دەوڵەتی سووریاش لەسەر جلی سەربازییان دەبەستن.

ئەم پڕۆسەیە نوێنەرایەتی گۆڕانکارییەکی گەورە دەکات لە پەیوەندییەکانی نێوان ئیدارەی خۆبەڕێوەبەری لە باکوور و ڕۆژهەڵاتی سووریا و حکومەتی ناوەندی، و ڕەنگە کۆتایی بە قۆناغی دووفاقی سەربازی بهێنێت لە ناوچەکەدا.