وه‌زیرى ده‌ره‌وه‌ى سوریا هێرشده‌كاته‌سه‌ر هه‌سه‌ده‌

وەزیری دەرەوەی سوریا دەڵێت، "ئەوان داوایان لەهەسەدە نەکردوە خۆی ڕادەستبکات یاخود خۆی بتوێنێتەوە، بەپێچەوانەوە هەموو شتێک بەهەسەدە بەخشراوەو نازانین لەوە زیاتر چی بکەن"، ڕاشیده‌گه‌یه‌نێت، "ئه‌وه‌ى ئێمه‌ به‌هه‌سه‌ده‌مان داوه‌، ئه‌گه‌ر كاتى خۆى به‌شار ئه‌سه‌د نیوه‌ى ئه‌وه‌ى بدایه‌، پێى ڕازیده‌بوون".

ئەسعەد شەیبانی وەزیری دەرەوەی سوریا لەلێدوانێکی ڕۆژنامەوانییدا ڕایگەیاند، "دەستپێشخەریمان پێشکەش بەهێزەکانی سوریای دیموکرات کردووە لەسەر بنەمای تێکەڵبونی تەواو لەگەڵ دامەزراوەکانی دەوڵەت لەبەرامبەر دەستەبەرکردنی ماف‌و نوێنەرایەتیی، هەروەها شتێک پێشکەش بەهەسەدە كراوە وەک، ڕێککەوتن، ڕێزگرتن، ماف، نوێنەرایەتی، پابەندبوون بەمافەکانی کورد، لەوە زیاتر چی بكەین؟".

ئاماژەی بەوەشدا، ئەم دەستپێشخەرییەی سوریا بۆ یەکەمجار کۆدەنگییەکی دەگمەنی لەنێوان ئەمریکاو تورکیادا بەدەستهێناوە.

لەبارەی تێکەڵکردنی هەسەدەش بەسوپا وتوویه‌تى، "ئێمه‌ بەهیچ جۆرێک داوامان لەهەسەدە نەکردووە خۆی ڕاده‌ستبکات یان خۆی بتوێنێتەوە لەناو سوپای سوریادا، بەڵکو وتومانە تێکەڵبن‌و مافتان دەبێت‌و دڵنیایی وەردەگرن، ئەوەش سازش نییەو دەوڵەتدارییە".

ئه‌و وەزیرە سورییە كه‌ له‌بنه‌ڕه‌تدا ڕه‌چه‌ڵه‌كى كورده‌ ئه‌وه‌شى وتووه‌، "هه‌سه‌ده‌ ڕێزگرتن‌و خاوەندارییەتییان لەلایەن ئەحمەد شەرعەوە پێشكەشكراوە، بەڵام نایانەوێت‌و ئەنجامی نەبووە، ئەگەر 20%ی ئەوەی ئێستا پێسکەشمانکردوون، ڕژێمی بەشار ئەسەد پێشکەشی بکردنایە، پێی ڕازیی دەبوون".