دوایین زانیاریى له‌باره‌ى كاته‌كانى پێدانى كاره‌باى نیشتمانییه‌وه‌

وەزیری كارەبای حكوومەتی هەرێمی كوردستان ئاشكرایدەكات، دوای هێرشەكەی سەر كیڵگەی غازی كۆرمۆر، ئێستا دەتوانین تەنها 6 بۆ 8 كاتژمێر كارەبا بدەینە هاووڵاتییان.

كەمال محەمەد وەزیری كارەبا رایگەیاند، بەهۆی هێرشەكەی شەوی ڕابردوو بۆ سەر كێڵگەی كۆرمۆر2700  تاوەکو 3000 مێگاوات كارەبا لەهەرێمی كوردستان كەمبووەتەوە.

كەمال محەمەد راشیگەیاند، ئێستا دەتوانن 6 بۆ 8 کاژێر کارەبا بۆ هاووڵاتییان دابین بكەین.

سەبارەت بەغازی ماڵانیش، وەزیری كارەبا وتی، "بۆ هەفتەیەك غازمان هەیە، بۆیە بەهیچ شێویەك غازی ماڵان گران نابێت".

لەكۆتاییدا ئاماژەی بەوەشدا، ئەگەر هێرشەكە تەنها زیانی بەر كۆگاكانی كێڵگەكە گەیاندبێت، ئەوا لەماوەی 24 تا 48 كاتژمێری داهاتوودا كارەبای نیشتمانی دەگەڕێتەوە دۆخی ئاسایی.

درەنگانی شەوی ڕابردوو كاتژمێر 11:30 بە چەند مووشەكێك هێرشكرایەسەر كێڵگەی غازی كۆرمۆرو بەهۆیەوە زیانێكی زۆر بەر كێڵگەكە كەوت، هەروەها كارەبای نیشتمانی بەشێكی زۆری پارێزگاكانی هەرێمی كوردستان پچڕا.