باڵیۆزخانەی ئەمریكا له‌باره‌ى هێرشەكەی سەر كێڵگەی كۆرمۆر هاته‌ده‌نگ

باڵیۆزخانەی ئەمریكا لەبەغدا لەڕاگەیەنراوێكدا سەركۆنەی هێرشەكەی شەوی ڕابردووی سەر كێڵگەی كۆرمۆر دەكات‌و جەختدەكاتەوە، ئەوان ئامادەن هاوكاری پێشكەشبكەن بۆ پاراستنی ژێرخانی وزەی هەرێمی كوردستان.

لەڕاگەیەنراوەكەی باڵیۆزخانەی ئەمریكا هاتووە، "ویلایەتەیەکگرتووەکانی ئەمریکا بەتوندی سەركۆنەی هێرشە تیرۆریستییەكەی سەر کێڵگەی کۆرمۆر لەسلێمانی دەکات".

ئه‌وه‌ش هاتووە، "ئێمە لەگەڵ حکوومەتی هەرێمی کوردستان‌و هاوبەشانی دیکە هاوڕاین لەداواکردن لەحکوومەتی عێراق بۆ گرتنەبەری ڕێوشوێنی دەستبەجێ بۆ لێپرسینەوە لەئەنجامدەرانی ئەم هێرشە تیرۆریستییە کە دوایین هەوڵە لەزنجیرەیەک هەوڵی لایەنە خراپەکان بۆ تێکدانی سەقامگیریی عێراق‌و بەئامانجگرتنی وەبەرهێنانی ئەمریکی لەهەرێمی کوردستان".

باڵیۆزخانەی ئەمریكا لەڕاگەیەنراوەكەدا وتوویەتی، "ئێمە ئامادەین پشتیوانی بکەین لەهەوڵەکان بۆ پاراستنی ژێرخانی وزەی هەرێمی كوردستان".

ئەوەش هاتووە، "جەخت لەسەر گرنگیی سەپاندنی سەروەری عێراق دەکەینەوە لەبەرامبەر هەوڵەکانی تێکدانی‌و دڵنیابوونەوە لەوەی کە هەموو چەکەکان، بەتایبەتی درۆن‌و مووشەک‌و ڕۆکێتەکان، بخرێنە ژێر کۆنترۆڵی دەوڵەتەوە".