ئەنجوومەنی باڵای دادوەری: هیچ بڕیارێک بۆ هەڵوەشاندنەوەی پەرلەمان دەرنەچووە

ناوەندی هەواڵ

ئەنجومەنی باڵای دادوەریی عێراق هەموو ئەو دەنگۆیانەی ڕەتکردەوە کە باس لە هەڵوەشاندنەوەی ئەنجومەنی نوێنەران یان ئەنجامدانی هەڵبژاردنی پێشوەختە دەکەن.

ناوەندی ڕاگەیاندنی ئەنجومەنی باڵای دادوەری لە بەیاننامەیەکدا ڕایگەیاندووە، ئەو زانیارییانەی لە تۆڕە کۆمەڵایەتییەکاندا بڵاوکراونەتەوە سەبارەت بە دەرچوونی بڕیاری دادگا بۆ هەڵوەشاندنەوەی پەرلەمان یان دەستپێکردنی هەڵمەتی کۆکردنەوەی ملیۆنێک واژۆ بۆ ئەنجامدانی هەڵبژاردنی پێشوەختە دوورن لە ڕاستییەوە.

دەشڵێت: ئەو پێگانەی ئەم هەواڵانەیان بڵاوکردووەتەوە پەیجی سێبەرن و هیچ پەیوەندییەکیان بە دەسەڵاتی دادوەرییەوە نییە.

ئەنجوومەنەکە داواشی لە دەزگاکانی ڕاگەیاندن کردووە،  لە گواستنەوەی ئەم جۆرە زانیارییە چەواشەکارانەدا ورد بن و تەنیا پشت بە سەرچاوە فەرمییەکان ببەستن بۆ وەرگرتنی هەواڵەکان تاوەکو ڕێگری بکرێت لە تێکدانی باری دەروونیی هاووڵاتیان و دروستکردنی پشێوی سیاسی لە وڵاتدا لەم قۆناغە هەستیارەدا کە عێراق پێیدا تێدەپەڕێت.