دەیان فرۆكەی ئیسرائیلی بە ئاسمانی سوریا و عێراقدا چوونەتە سنوری ئێران

پێگەی ئاكسیۆس لە زاری لێپرسراوانی ئیسرائیل و ئەمریكا ئاشكرایكردووە، دەیان فڕۆكەی جەنگیی هێزی ئاسمانیی ئیسرائیل تاوەكو نزیك سنوورەكانی ئێران رۆیشتوون، ئەوەش لە چوارچێوەی مانۆڕێكی سەربازی بۆ پێشاندانی هێز و بەرپەرچدانەوەی تاران پێش هەڵبژاردنە گشتییەكانی ئیسرائیل.

بەپێی هەواڵی پێگەی ئاكسیۆس، ئەم جوڵە سەربازییە لە مەودای زیاتر لە هەزار و 300 كیلۆمەتر لە ئیسرائیلەوە كراوە، ئەمەش هەفتەیەك پێش وادەی بەڕێوەچوونی هەڵبژاردنەكانی ئیسرائیل كە بڕیارە 27ــی ئەو مانگە بكرێت، هاوكاتیشە لەگەڵ سەردانەكەی پێت هێگسێس، وەزیری جەنگی ئەمریكا بۆ بنكەی ئاسمانیی عۆڤدا لە ئیسرائیل و كۆبوونەوەی لەگەڵ بنیامین نەتەنیاهۆ، سەرۆكوەزیرانی ئیسرائیل.

فڕینی فڕۆكە جەنگییەكان ڕۆژی دووشەممە ڕوویداوە، بە یاوەریی فڕۆكەی گواستنەوەی سووتەمەنی بووە و بە هەمان ئەو رێڕەوە ئاسمانییەدا رۆیشتوون كە پێشتر بۆ لێدانی ئێران بەكارهاتووە، بە جۆرێك بەسەر ئاسمانی سوریا و عیراقدا تێپەڕیون، بەڵام كاتێك گەیشتوونەتە نزیك سنووری ئێران، سووڕاونەتەوە و گەڕاونەتەوە بۆ ئیسرائیل.

بەپێی وتەی لێپرسراوانی ئەمریكا، ئیسرائیلییەكان زانیویانە سیستەمی بەرگریی ئاسمانیی ئێران شوێنپێی ئەو فڕۆكانە هەڵدەگرێت، هاوكات ئیسرائیل پێشوەختە واشنتنی لە مانۆڕەكە ئاگادار كردووەتەوە.

هەفتەی رابردوو ماڵپەڕی ئاكسیۆس ئاشكرای كردبوو، لە سەرەتای مانگی تشرینی یەكەمدا بنیامین نەتەنیاهۆ سەرۆكوەزیرانی ئیسرائیل و دۆناڵد ترەمپ، سەرۆكی ئەمریكا گفتوگۆی ئەگەری دەستپێكردنی ئۆپەراسیۆنێكی سەربازیی گەورەیان دژ بە ئێران كردووە، پێش هەڵبژاردنەكانی ئیسرائیل و ئەمریكا.

بەڵام ئەیال زامیر، سوپاسالاری ئیسرائیل هۆشداریی داوەتە جەنەراڵ دان كەین، سەرۆكی دەستەی ئەركانی هاوبەشی ئەمریكا كە دەستپێكردنەوەی شەڕ لەم قۆناغەدا دەبێتە هۆی دواخستنی هەڵبژاردنەكانی ئیسرائیل، بەو پێیەی ئێران بە دڵنیاییەوە وەڵام دەداتەوە.

 هەرچەندە سەرەتا ترەمپ ئارەزووی دەستپێكردنەوەی هێرشەكانی هەبووە، بەڵام دواتر پاشگەزبووەتەوە و پێشنیازەكەی نەتەنیاهۆی رەتكردووەتەوە. لێپرسراوێكی ئیسرائیلیش دووپاتی كردووەتەوە زامیر رێگە بە هیچ جووڵەیەكی سەربازیی بێ پاساو نادات كە هەڵبژاردنەكانی 27ـی تشرینی یەكەم پەكبخات.