گۆڕانكارییەكی هەستیار؛ نەتەنیاهۆ جەنگاوەرە بە ڕەچەڵەك سۆڤێتیەكە بۆ سەرۆكی مۆساد كاندید دەكات

ناوەندی هەواڵ

لە هەنگاوێكی چاوەڕواننەكراو و لە كاتێكی هەستیاری مێژوویی ناوچەكەدا، بنیامین نەتانیاهۆ، سەرۆك وەزیرانی ئیسرائیل، بڕیاریدا گۆڕانكاری لە لوتكەی هەڕەمی یەكێك لە بەهێزترین دەزگا هەواڵگرییەكانی جیهان بكات. رۆمان گۆفمان، ئەو فەرماندە سەربازییەی كە ڕەگ و ڕیشەی دەگەڕێتەوە بۆ یەكێتی سۆڤیەتی جاران، وەك كاندیدی سەرەكی بۆ شوێنگرتنەوەی دەیڤید بارنی دیاری دەكات.

رۆمان گۆفمان كێیە؟

رۆمان گۆفمان لە ساڵی ١٩٧٦ لە وڵاتی بێلارووس لەدایكبووە. لە تەمەنی ١٤ ساڵیدا (ساڵی ١٩٩٠) لەگەڵ خێزانەكەی كۆچیان كردووە بۆ ئیسرائیل. ژیانی سەربازیی ئەو لە ساڵی ١٩٩٥ دەستی پێكرد، كاتێك پەیوەندی بە هێزی بەرگریی ئیسرائیل (IDF) كرد. گۆفمان زۆربەی ژیانی پیشەیی خۆی لە "فەیلەقی زرێپۆش" بەسەر بردووە و پلەبەپلە لە پۆستە سەربازییەكاندا سەركەوتووە.

حەوتی ئۆكتۆبەر؛ وێستگەی وەرچەرخان

ئەوەی گۆفمان لە فەرماندەكانی تر جیا دەكاتەوە، بەشداریكردنی ڕاستەوخۆی بوو لە شەڕەكانی دوای حەوتی ئۆكتۆبەری ٢٠٢٣. لەو ڕۆژەدا كە حەماس هێرشە كتوپڕەكەی ئەنجامدا، گۆفمان یەكێك بوو لەو فەرماندە باڵایانەی كە ڕاستەوخۆ چووە مەیدانی جەنگ بۆ ڕووبەڕووبوونەوەی چەكدارەكان و لەوێدا بە سەختی برینداربوو. ئەم ڕووداوە پێگەی ئەوی لە ناوەندە سەربازی و سیاسییەكانی ئیسرائیلدا بەهێزتر كرد و وەك "قارەمانێكی مەیدانی" ناسێنرا.

پۆستەكان و كاندیدكردنی بۆ مۆساد

پێش ئەوەی بۆ پۆستی سەرۆكی مۆساد كاندید بكرێت، گۆفمان لە ساڵی ٢٠٢٤ـەوە پۆستی فەرماندەی ناوەندی مەشقی پیادەی نیشتمانی (Tze'elim)ی بەدەستەوە بوو.

نەتانیاهۆ  بە فەرمی گۆفمانی بۆ سەرۆكایەتیی مۆساد كاندید كرد. بڕیارە گۆفمان بە فەرمی دەستبەكار بێت و شوێنی دەیڤید بارنی، بەڕێوەبەری ئێستای مۆساد بگرێتەوە.

بۆچی گۆفمان لەم كاتەدا؟

هەڵبژاردنی گۆفمان لەلایەن نەتەنیاهۆوە چەند ئاماژەیەكی گرنگ لەخۆ دەگرێت:
١. ئەزموونی مەیدانی: نەتەنیاهۆ دەیەوێت كەسێك لە سەرووی مۆساد بێت كە تەنیا شارەزای هەواڵگری نەبێت، بەڵكو ئەزموونی شەڕی ڕاستەوخۆی هەبێت.
٢. دڵسۆزی و متمانە: گۆفمان وەك كەسایەتییەكی نزیك لە دیدگای نەتەنیاهۆ بۆ ئاسایشی نیشتمانی دەبینرێت.
٣. گۆڕانی ستراتیژی: دەستبەكاربوونی ئەو هاوكاتە لەگەڵ پەرەسەندنی گرژییەكان لەگەڵ ئێران و گروپە چەكدارەكانی ناوچەكە، كە پێویستی بە جۆرێكی نوێ لە سەركردایەتی هەیە.

دەتوانێت مۆساد بەرەو قۆناغێكی نوێ ببات؟

رۆمان گۆفمان لە گەنجێكی كۆچبەری بێلارووسییەوە، ئێستا خۆی بۆ وەرگرتنی یەكێك لە هەستیارترین پۆستە ئەمنییەكانی جیهان ئامادە دەكات. ئایا ئەو دەتوانێت مۆساد بەرەو قۆناغێكی نوێ ببات، یان ئاڵنگارییە هەرێمییەكان رێڕەوی كارەكانی دەگۆڕن؟