هاوپەیمانێتی یەکێتی و نەوەی نوێ؛ نەخشەی ململانێ و ئایندەی پێکهێنانی حکومەت

لەم یارییە سیاسییەدا، وا دەردەکەوێت شاسوار عەبدولواحید ڕۆڵی سەرەکی دەگێڕێت، بەڵام شیکەرەوەکان هۆشداری دەدەن کە ڕەنگە هەردوو حزبی دەسەڵاتدار نەوەی نوێ وەک "مقاش" بۆ لێدانی یەکتری بەکاربهێنن

ناوەندی هەواڵ

پرسی پێکهێنانی کابینەی نوێی حکومەتی هەرێمی کوردستان و کاراکردنەوەی پەرلەمان، پێی ناوەتە قۆناغێکی نوێ و ئاڵۆز لە ململانێ سیاسییەکاندا، دوای جموجوڵێکی چڕی چەند ڕۆژی ڕابردوو بۆ کۆتایهێنان بەو چەقبەستووییە، هاوپەیمانێتییەکی نوێ لە نێوان یەکێتیی نیشتمانیی کوردستان و جووڵانەوەی نەوەی نوێ پێکهێنراوە.

سەرچاوەیەکی باڵای یەکێتی ڕایگەیاندووە کە ڕەنگە بەمزووانە و لەم دوو ڕۆژەدا، ڕێککەوتنی فەرمی نێوان هەردوولا لە مەڕاسیمێکدا واژۆ و ڕابگەیەنرێت.ئەم هاوپەیمانێتییە کە لەسەر بنەمای "حکومەتێکی ڕەشید، دادپەروەر و خزمەتگوزار" و گۆڕینی ڕێڕەوی حوکمڕانی دامەزراوە، پۆستی سەرۆکی حکومەت یان سەرۆکی هەرێم بۆ خۆی بە ڕەوا دەبینێت. شاسوار عەبدولواحید، سەرۆکی نەوەی نوێ ڕایگەیاندووە پۆستی سەرۆک وەزیران دەبێت بۆ ئەم بەرەیە بێت، ئەمەش بێستوون فایەق، ڕاوێژکاری بافڵ تاڵەبانی پشتڕاستی کردووەتەوە.لەم نێوەندەدا، پارتی دیموکراتی کوردستان ئەم جووڵانەوەیە بە مەترسی بۆ سەر پێگەی خۆی دەبینێت و توڕەیی خۆی نیشانداوە.

لێدوانێکی چوار ڕۆژ لەمەوبەری شاسوار عەبدولواحید کە وتبووی "یان پارتی دەبێت سازش بکات یان هەرێم هەڵدەوەشێتەوە"، کاردانەوەی توندی کادیرانی پارتی لێکەوتەوە و داوای دادگاییکردنی دەکەن. ئەشواق جاف، ئەندامی کۆمیتەی ناوەندی پارتی، هۆشداری دا کە قەوارەی هەرێم بەرهەمی خوێنە و هەر هەوڵێک بۆ لاوازکردنی، سیستەمی سیاسی عێراق تێکدەدات.

پارتی ڕەتیدەکاتەوە مامەڵە لەگەڵ بەرەیەکی هاوبەشی یەکێتی و نەوەی نوێ پێکەوە بکات. لە ئێستادا دانوستانەکانی نێوان پارتی و یەکێتی جۆرێک لە وەستانی بەخۆیەوە بینیوە، بەڵام هێشتا نەگەیشتووەتە بنبەستی تەواو، لە کاتێکدا کێبڕکێی توند لەسەر ڕاکێشانی لایەنەکانی دیکە بەردەوامە.

کێشمەکێشی قووڵ

بۆ تێگەیشتن لەم کێشمەکێشە قووڵە و هۆکاری پەنابردنی لایەنەکان بۆ ئەم جۆرە هاوپەیمانێتییانە، پێویستە سەیری پاشخانی ناوخۆیی و سیناریۆ شاراوەکان بکەین:

دواکەوتنی دوورودرێژی پڕۆسەکە: زیاتر لە ساڵێک و هەشت مانگە پەرلەمانی کوردستان بە چاوەڕوانی ڕێککەوتنی پارتی و یەکێتی ماوەتەوە. یەکێتی و نەوەی نوێ پێکەوە خاوەنی (٢٣ + ١٥ = ٣٨) کورسین، بەڵام تا ئێستا هێزەکانی وەک یەکگرتوو، کۆمەڵ، گۆڕان و سۆسیالیست ئامادە نەبوون بچنە پاڵ ئەم بەرەیە، بۆیە چاویان لە کورسییەکانی ڕەوتی هەڵوێست و بەرەی گەلە.

ستراتیژی جیاوازی پارتی و یەکێتی: پارتی دەیەوێت سەرەتا پەرلەمان کارا بکاتەوە؛ چونکە پێی وایە لە دوای دانیشتنی یەکەم دەتوانێت بەشێک لە پەرلەمانتارانی نەوەی نوێ بەلای خۆیدا ڕابکێشێت. لە بەرامبەردا، یەکێتی لەم پلانە تێگەیشتووە و دەیەوێت پێش کاراکردنەوەی پەرلەمان، بەم مانۆڕ و هاوپەیمانێتییە، پارتی ناچار بکات لەسەر کێکەکە و پۆستەکانی حکومەت ڕێکبکەوێت.

نەوەی نوێ وەک مقاش یان کاراکتەر: لەم یارییە سیاسییەدا، وا دەردەکەوێت شاسوار عەبدولواحید ڕۆڵی سەرەکی دەگێڕێت، بەڵام شیکەرەوەکان هۆشداری دەدەن کە ڕەنگە هەردوو حزبی دەسەڵاتدار نەوەی نوێ وەک "مقاش" بۆ لێدانی یەکتری بەکاربهێنن و لە کۆتاییدا خۆیان ڕێکبکەون. یەکێتی پەیامی ئەوەی ناردووە کە لە بژاردەی دووبارەکردنەوەی هەڵبژاردنیش ناترسێت ئەگەر هاوسەنگی هێز چاک نەکرێتەوە.