شەوی رابردوو هێرشێکی درۆنی لە سنووری خورماتووەوە کرایە سەر کێڵگەی غازی کۆرمۆر لە قەزای چەمچەماڵ و بەشی کۆگاکان، شوێنی LPG و کۆندێنسەیتی پێکا.
بەپێی ڕاگەیەندراوی هاوبەشی وەزارەتی سامانە سروشتییەکان و وەزارەتی کارەبا،
«بەهۆی ئەم هێرشەوە بەرهەمهێنانی کارەبا بڕی ٢٨٠٠ مێگاوات کەمبووەوە»
و کارەبای زۆربەی گەڕەکەکانی هەولێر و بەشێک لە سلێمانی پچڕا.
کۆمپانیای دانەگاز بەشی ئەمنی خستە ئامادەباشییەوە و هەوڵەکان بەردەوامن بۆ ئاساییکردنەوەی دۆخەکە، بەڵام ئەم ڕووداوە درێژکراوەی زنجیرەیەک پەلاماری بەردەوامە کە لە نیسانی ٢٠٢٤ەوە تا تشرینی دووەمی ٢٠٢٥ ژێرخانی وزەی کردووەتە ئامانج.
کاتی ئەم هێرشەی ٩ی تشرینی دووەمی ٢٠٢٦ بە هیچ جۆرێک هەڕەمەکی نییە، بەڵکوو هاوکاتە لەگەڵ نزیکبوونەوە لە وادەی ٢٠٢٧ کە بەغدا بۆ کۆتاییهێنان بە هاوردەکردنی گازی ئێرانی دیاری کردووە.
کۆرمۆر و پرۆژەی فراوانکردنی (KM250) کۆڵەکەی سەرەکیی ئەم پلانەن، لێدانی ئەم کێڵگەیە پەیامێکی ڕوونی هێزە پڕۆکسییەکانە بۆ ڕێگریکردن لە سەربەخۆیی گازیی عێراق و کوردستان. ئەمە لە کاتێکدایە کە ناوچەکە بە ململانێی هەرێمیی نێوان بەرەی موقاوەمە و هاوپەیمانانی ئەمریکادا تێدەپەڕێت و کۆرمۆر بووەتە ئاسانترین مەیدان بۆ ناردنی پەیامی سیاسی.
کێڵگەی کۆرمۆر کە زیاتر لە ٨٠٪ی کارەبای هەرێمی کوردستان و ٤٥٪ی گازی بەکارهێنراوی ناوخۆی عێراق دابین دەکات، سەلماندوویەتی کە شادەماری ئابووریی وڵاتە. هێرشکردنە سەر ئەم ژێرخانە جگە لە زیانە داراییە ڕاستەوخۆکان کە ڕۆژانە بە ملیۆنان دۆلار دەخەمڵێنرێت، گورزێکی کوشندە لە متمانەی وەبەرهێنەران دەدات. لەم نێوەندەدا، پرسیارێکی گەورە لەسەر نەبوونی سیستەمی بەرگریی ئاسمانی و دژەدرۆنی یەکگرتوو دەکرێت کە هەرێم بەردەوام داوای کردووە، چونکە بێ ئەم پارێزبەندییە، وەبەرهێنانی کۆمپانیاکانی وەک دانەگاز لەبەردەم مەترسیی بەردەوامدا دەمێننەوە.
«دەستەبژێری دەسەڵاتداری بەغدا ناتوانێت یان نایەوێت بەرپرسیارێتی لە ئەستۆ بگرێت»
. حەشدی شەعبی و میلیشیاکان بودجەی فەرمی و دەسەڵاتیان هەیە، بەڵام کاتێک پەلاماری کۆرمۆر دەدرێت، دەوڵەت بێدەنگ دەبێت. هەرچەندە هێرشەکەی ئەمشەو نیشانی دا کە زیانگەیاندن بە کۆرمۆر تەنیا هەرێم ناتبێتەوە، بەڵکوو وێستگەکانی کارەبا لە کەرکووک، سەڵاحەدین، نەینەوا و تۆڕی فیدراڵیی بەغداش تووشی تاریکی و داڕمان دەکات؛ بەمەش پەکخستنی کوردستان بە مانای پەکخستنی تەواوی عێراق دێت.
بە وتەی چاودێران، بۆ دەربازبوون لەم بنبەستە مێژووییە، پێویستە دەستبەجێ چەند هەنگاوێک بنرێن: بەغدا هێزی دارایی خۆی بخاتە گەڕ و بودجە و مووچەی ئەو هێزانە ببڕێت کە تۆمەتبارن بە هێرشکردن، پرۆتۆکۆلێکی ئەمنیی هاوبەش بۆ جێگیرکردنی سیستەمی دژەدرۆن لە نێوان هەولێر و بەغدا و هاوپەیمانان پەیڕەو بکرێت، و ناسنامەی بکەرانی تاوانەکە بە ئاشکرا بۆ رای گشتی ڕابگەیەنرێت. عێراق ناتوانێت لە هەمان کاتدا بانگەشەی سەروەریی وزە بکات و ڕێگەش بدات میلیشیاکان گرنگترین کێڵگەی گازی وڵات وەک بارمتە بەکاربهێنن.
