دژى دابەشنەکردنى هاوکارى هاوپەیمانان لیواى 9ى پیادە دەستیان بە خۆپیشاندان کرد

ناوەندی هەواڵ

دژى خەرجنەکردنى هاوکارى هاوپەیمانان لیواى 9ى پیادەى سەر بە وەزارەتى پێشمەرگە جارێکى دیکە خۆپیشاندانیان ئەنجامدا و داواى لادانى بەرپرسێکى سەربازى دەکەن کە رێگرە لە پێدانى هاوکارییەکان.

مانگى رابردوو  وەزارەتی پێشمەرگە ڕایگەیاند، مانگانە جیا لە مووچە، بڕی 430 هەزار دینار هاوکاریی هاوپەیمانان دەدەنە پێشمەرگە، مانگی ڕابردوو هاوکارییەکە دابەش کرا و بڕیارە تا ساڵی 2026 بەردەوام بێت، بەڵام بەشێک لە هێزەکان لەو هاوکارییە بێبەشکران.

ئەمڕۆ یەکشەمە لەگەڵ دەستپێکردنى دابەشکردنى مووچەى مانگى شەش پێشمەرگەکانى لیواى 9ى پیادە دژى دابەشنەکردنى هاوکارى هاوپەیمانان بەسەریاندا خۆپیشاندانیان ئەنجامدا و لە بەیاننامەیەکدا چەند داواکارییەکیان ئاراستەى سەرۆکى هەرێم و سەرۆکى حکومەت و وەزیرى پێشمەرگە کرد.

لەبەیاننامەکەدا هاتووە، چەندینجار هەوڵی چارەسەری كێشەكانیان داوەو چەندین جار بەڵێنیان پێدراوە، بەڵام تا ئێستا كێشەكەیان چارەسەر نەكراوە و  هۆکارى خۆپیشاندانەکەیان بۆ بێبەشکردنیان لە هاوکارى هاوپەیمانان و دەگەڕێتەوە  و دەڵێنن ئەو کەسەى بووەتە هۆى ئەوەى هاوکارییەکە نەیانگرێتەوە لە لیواکەیان پێویستە دووربخرێتەوە.

جەختدەکەنەوە کە دەبێت وەک هەر یەکەیەى سەربازى دەبێت ئەو هاوکارییەى هاوپەیمانان دەیدەن ئەوانیش بگرێتەوە کە مانگى پێنج لیواکەیانى لێ بێبەشکراوە و مانگى شەشیش لێى بێبەش دەکرێن.