ڕۆژنامەی سەباح: پەرلەمان گەمارۆکانى سەر فڕۆکەخانەى سلێمانی تاوتوێ دەکات

ناوەندی هەواڵ

پەرلەمانتارێکی عێراق ڕایدەگەیەنێت، لە دانیشتنەکانی داهاتوودا پەرلەمانی عێراق گفتوگۆ لەبارەی دۆسیەی سزادانی فڕۆکەخانەی سلێمانی لەلایەن تورکیا و لەشکرکێشییەکانی ئەو وڵاتە بۆ نێو خاکی هەرێمی کوردستان دەکات.

فاتن قەرغولی، ئەندامی لیژنەی گواستنەوە و گەیاندنی پەرلەمانی عێراق بە ڕۆژنامەی سەباحی وتووە، لیژنەکەیان چوونەتە فڕۆکەخانەی سلێمانی، لەگەڵ بەرپرسانی فڕۆکەخانەکە گفتوگۆیان لەبارەی سزاکانی تورکیا و ڕاگرتنی گەشتەکانی سلێمانی لەگەڵ فڕۆکەخانەکانی تورکیا کردووە، لە دوای سەردانەکەیان، بابەتەکەیان بۆ سەرۆک وەزیرانی عێراق خستووەتەڕوو تا دەستوەردانی دیپلۆماسی بکات.

لەبارەی ئۆپراسیۆنەکانی تورکیا لەنێو خاکی هەرێمی کوردستان، ئەو پەرلەمانتارە دەڵێت، لەشکرکێشییەکانی تورکیا لە هێرش و ئۆپراسیۆنی سەربازییەوە خەریکە دەبێتە داگیرکاریی ڕاستەقینە.

جەختی کردووەتەوە،، بوونی تورکیا لە هەرێمی کوردستان قبووڵکراو نییە و لەلایەن پەرلەمان و لیژنە تایبەتمەندەکانییەوە بەتایبەت لیژنەی ئاسایش و بەرگری گفتوگۆی لەبارەوە دەکرێت.

پێشتریش لیژنەی گواستنەوە و گەیاندنی پەرلەمانی عێراق له‌ به‌یاننامه‌كه‌یەکدا بڵاویکردەوە،  فڕۆكه‌خانه‌ی نێوده‌وڵه‌تی سلێمانی هیچ كێشه‌یه‌كی یاسایی و هونه‌ری و ئیداری و ئه‌منی نییه‌و له‌لایه‌ن توركیاوه‌ سزای سیاسی دراوه‌و پێویسته‌ ئه‌و سزایه‌ كۆتایی پێبهێنرێت.