مه‌رجى نوێ بۆ هاورده‌كردنى ئۆتۆمبێل ڕاده‌گه‌یه‌نرێت

وەزارەتی بازرگانی عێراق مه‌رجى نوێ بۆ هاورده‌كردنى ئۆتۆمبێل ئاشكراده‌كات‌و وته‌بێژى وه‌زاره‌تى بازرگانى عێراقیش ڕایده‌گه‌یه‌نێت، "بەئامانجی ڕێكخستنه‌وه‌ی شەقامەكان‌و هاوردەی ئۆتۆمبێل، چەند ڕێنماییەكمان ئاراستەی ئەنجومەنی وەزیران كردووەو چاوەڕوانی پەسەندكردنین‌و ڕاسته‌وخۆش ده‌چێته‌ بواری جێبه‌جێكردنه‌وه‌".

محەمەد حەنون وتەبێژی وەزارەتی بازرگانی عێراق ڕایگەیاند، لەگەڵ لایەنە پەیوەندیدارەكانی حكومەت كارده‌كات بۆ چاره‌سه‌ركردنی قه‌یرانی گواستنه‌وه‌و قه‌ره‌باڵغی‌و بێسه‌روبه‌ری هاورده‌كردنی ئۆتۆمبێل.

به‌وته‌ی حه‌نون، به‌شێكی دیكه‌ له‌كاری ڕێكخستنه‌وه‌كانیان تایبه‌ت به‌كوالێتی‌و مواسه‌فاتی ئۆتۆمبێلەكان‌و ئه‌و وڵاته‌نه‌یه‌ كه‌ لێییه‌ هاورده‌ى ده‌كه‌ن، به‌جۆرێكیش ده‌بێت، ئۆتۆمبێله‌كان له‌گه‌ڵ ژینگه‌ی عێراق‌و ئه‌و مه‌رجانه‌ بگونجێن كه‌ ده‌ستنیشانكراون.

حه‌نون ئه‌وه‌شى وتوه‌، "جێبەجێکردنی دیسپلینه‌ نوێكان، کاتێک لەلایەن ئەنجومەنی وەزیرانەوە پەسەند دەکرێت، کاریگەری ئەرێنی دەبێت لەسەر ڕەوتی هاتوچۆو باشترکردنی کەرتی گواستنەوە، بەوپێیەی بەبەشداریی سەرجەم دامەزراوە پەیوەندیدارەکان پەرەیان پێدراوە".