بەغدا بەشێك لە كورتهێنانی مووچەی فەرمانبەرانی هەرێم پڕدەكاتەوە

ناوەندی هەواڵ

بەپێی زانیارییەكان وەزارەتی دارایی عێراق دەستی كردووە بە گواستنەوە لە پشكی هەرێمی كوردستان لە یاسای بودجە، ئەگەر بگەنە ئەنجام بڕی 400 ملیار دیناری دیكە بەم زووانە دابین دەكرێت و بۆ مووچەی مانگەكانی 10 و 11 و 12 خەرج دەكرێت.
هەربەپێی زانیارییەكان، چەند رۆژێكە لە وەزارەتی دارایی عێراق كۆبوونەوەی جیدی و چڕ بەرێوەدەچێت تاوەكو لەبارەی گواستنەوەكە بەزوویی بگەنە ئەنجامێك، ئەمڕۆش ڕەنگە لە كۆبوونەوەی ئەنجومەنی وەزیرانی عێراق بڕیارێك لەوبارەیەوە بدرێت و تەنها واژۆی محەمەد شیاع سودانی سەرۆك وەزیرانی عێراق ماوە. 
بەپێی زانیارییەكان ئەو 400 ملیار دینارە بۆ یەك مانگ نییە و دابەش دەكرێتە سەر ئەو سێ مانگەی ماوە، بەڵام هێشتا بەوتەی سەرچاوەیەك لە وەزارەتی دارایی و ئابوری هەرێمی كوردستان كورتهێنان دەبێت.
حكومەتی هەرێمی كوردستان پێویستی بە 996 ملیار دینار هەیە بۆ مووچە، وەزارەتی دارایی عێراق سێ ڕۆژ لەمەوبەر بڕی 761 ملیار دیناری نارد، لەگەڵ ئەو 110 ملیارەی بڕیارە بینێرێت دەكاتە 871 ملیار دینار.
سەرچاوەیەكیش لە وەزارەتی دارایی و ئابوری هەرێمی كوردستان دەڵێت "تەنها  125ملیار دینار كورتهێنان دەمێنێتەوە".

دوو ڕۆژە بەغداد زیاتر لە 763 ملیار دیناری بۆ هەرێمی کوردستان ناردووە، بەڵام حکومەتی هەرێمی کوردستان ئامادە نییە مووچە دابەش بکات، مووچەخۆرانیش زیاتر لە 47 ڕۆژە لە چاوەڕوانی مووچەدان.