بەهۆی دوو هۆکار تاوەکو ئێستا لیستی مووچەی مانگی دوو ئامادە نەکراوە

ناوەندی هەواڵ

بەپێی زانیارییەکان لە وەزارەتی دارایی هەرێمی کوردستان، تا ئەمڕۆش یەکشەممە، 16-2-2025 تەرازووی پێداچوونەوە و لیستی مووچەی مانگی 2/شوبات ئامادە نەکراون و داواش لە وەزارەتەکان کراوە کاری لەسەر بکەن، هەرکاتێک تەواو بوون، بۆ وەزارەتی دارایی بنێرن.

هۆکاری دواکەوتنەکە بۆ ئەو گۆڕانکارییانە دەگەڕێتەوە کە لە لیستی مووچە ڕوویان داوە.

لیستی مووچەی مانگی دوو هەمان لیستی مانگی یەک دەبێت، کە بە شێوازی یەکگرتووی دیجیتاڵی (سیستمی پایڕۆڵ) ئامادەکراوە، تەنیا ناوی ئەو کەسانەی لێ دەردەهێندرێت کە لەم مانگەدا خانەنشین دەبن.

بەپێی زانیارییەکانی "ئیرادە" سەبارەت بە مووچەی مانگی 12ی ساڵی رابردوو،هیچ گفتوگۆ، تەنانەت تەلەفۆن و نامەیەکیش لەنێوان هەرێمی کوردستان و عێراق لەسەر ئەو مووچەیە نییە، چونکە بەغدا پێشتر وتوویەتی گفتوگۆ لەسەر مووچەی مانگەکانی ئەمساڵ دەکات، نەوەک ساڵی رابردوو.