كۆمپانیا بیانیه‌كانى نه‌وت له‌هه‌رێم.. به‌ڵاى گه‌وره‌ى گیرفانى موچه‌خۆران

ناوەندی هەواڵ

ئه‌و كۆمپانیایانه‌ى بۆ قازانج‌و په‌یداكردنى پاره‌ ڕویان له‌هه‌رێم كردوه‌و به‌دواى نه‌وتدا وێڵن، ئێستا بونه‌ته‌ گه‌وره‌ترین كێشه‌و به‌تاڵبونى گیرفانى موچه‌خۆرانى هه‌رێم، چونكه‌ ئاستەنگ بۆ هەناردەکردنەوەی نەوتی کوردستان دروستدەکەن.

بەهۆی کێشەکانی نێوان کۆمپانیا بەرهەمهێنەرەکانی نەوت‌و کۆمپانیای سۆمۆ، هێشتا نەوتی هەرێم ڕادەستی بەغدا نەکراوە، عێراق به‌فه‌رمى ئاشكرایكردوه‌، ئه‌گه‌ر ئه‌و بڕه‌ نه‌وته‌ى ئێستا له‌هه‌رێم به‌رهه‌مده‌هێندرێت ڕاده‌ستیان بكرێت، هه‌نارده‌ى ده‌ره‌وه‌ى ده‌كه‌ن.

گفتوگۆکان لەنێوان هەولێرو بەغدا بۆ گەیشتن بەڕێککەوتن لەسەر بابەتی داهاتی نانەوتی بەردەوامن، شاندی هەرێم‌و عێراق هەردولا سورن لەسەر قسەکانی خۆیان، بەڵام گفتوگۆ هەیە لەنێوان شاندێکی وەزارەتی دارایی هەرێم‌و دیوانی چاودێریی دارایی عێراق بۆ ئەوەی بگەن بەڕێککەوتن لەسەر ئەم پرسەو چیتر موچە دوانەکەوێت.

به‌گوێره‌ى ئه‌و زانیاریانه‌ى سەرچاوەیەکی باڵای حکومەتی هەرێم ئاشكرایكردوه‌، هێشتا مشتومڕ لەسەر داهاتی نانەوتی بەردەوامە، به‌شێوه‌یه‌ك عێراق داوادەکات 100% داهاتی باج‌و گومرگی پێبدەن‌و 50%ی داهاتی بەڕێوەبەرایەتییەکانی دەوێت، بەڵام خۆی به‌گوێره‌ى یاسا، پێچەوانەی ئەوەیە.

ئه‌و سه‌رچاوه‌ باڵا حكومیه‌ باسى له‌وه‌كردوه‌، سەبارەت بەپرسی نەوت، تا هەناردەکردنەوەی دوابکەوێت لەسودی عێراقە، چونکە وەکو ئاشکرایە لەلایەن ئۆپیکەوە ئەو بڕەی بۆ دیاریکراوە کە دەتوانێت چەند هەناردە بکات‌و ئەگەر نەوتی هەرێمیش وەربگرێت هەر ناتوانێت لەم بڕەی بۆی دیاریکراوە زیاتر هەناردە بکات، بۆیە دەبێت لەپشکی پارێزگاکانی دیکە کەمبکاتەوە، بەڵام ئەم بابەتە تەواوبوەو کۆتاییهاتوەو ڕێککەوتون‌و لەچەند ڕۆژی داهاتوش هەناردەکردنەوەی دەستپێدەکات.

زانیارییه‌كان باس له‌وه‌ده‌كه‌ن، ئەوەی ماوەتەوە بەهۆی پشوەوە بابەتی موچە کەوتوەتە هەفتەی داهاتوەوە، ئەوکاتە بەڕادەستکردنی 120 ملیار دینار داهاتی نانەوتی‌و دەستپێکردنەوەی هەناردەکردنەوەی نەوتی کوردستان کێشەکان بەرەو چارەسەربون دەچێت‌و ئەگەر هەیە موچە بنێردرێت.

سەبارەت بەوەی، بۆچی لەئێستاوە داهاتی نانەوتی 120 ملیارەکە نانێرن؟ سەرچاوەکەی حکومەتی هەرێم جه‌ختیكردوه‌ته‌وه‌، "هیچ گرەنتییەک نییە بۆ ئەوەی کە داهات بنێرین‌و ئەوان موچەمان بۆ بنێرن، بەڵام ئەو پارەیە ئامادەیەو لەئەمانەت دانراوە، هەرکاتێک گرەنتی درا دەینێرین".

ئه‌مه‌ش له‌كاتێكدایه‌، شاخەوان عەبدوڵڵا جێگری سەرۆكی پەرلەمانی عێراق لەدواین لێدوانیدا ئاماژەی بەوەكردبوو، ڕێككەوتن لەسەر دۆسییەی نەوت كراوەو پرسی داهاتە ناوخۆییەكانیش هەنگاوی گەورەی بڕیوە، بەڵام بەگوێرەی دواین زانیارییەكان، هەرێم تائێستا هیچ بڕە نەوتێكی ڕادەستی كۆمپانیای سۆمۆ نەكردوە، ئەوە لەكاتێكدایە، وەزارەتی نەوتی عێراق‌و سۆمۆ ئامادەییان دەربڕیوە بۆ وەرگرتنی هەر بڕە نەوتێك كە لەلایەن هەرێمه‌ ڕادەستبكرێت.