به‌غدا قاسه‌ى خاڵه‌ سنوریه‌كانیش خاڵى ده‌كاته‌وه‌

ناوەندی هەواڵ

سه‌رباریى گفتوگۆ له‌سه‌ر داهاتى نا نه‌وتى، به‌غدا داهاتى خاڵه‌ سنوریه‌كانیشى په‌لكێشى نێو گفتوگۆكانى كرد، ته‌یف سامى ده‌ڵێت: داهاتى خاڵه‌ سنوریه‌كان هه‌رچه‌ند بێت، نیوه‌یمان ده‌وێت.

ئه‌گه‌ر تا ئه‌مڕۆ گفتوگۆى شانده‌كانى هه‌ولێرو به‌غدا له‌چوارچێوه‌ى پرسى نه‌وت‌و داهاتى ناوخۆى هه‌رێم بوبێت، ئه‌وا خاڵه‌ سنوریه‌كان‌و ئه‌و داهاته‌ى له‌وێوه‌ ده‌ست هه‌رێم ده‌كه‌وێت، بابه‌تێكى نوێى نێو كۆبونه‌وه‌كانه‌و ڕێكه‌وتنیشى له‌باره‌وه‌ كراوه‌.

به‌گوێره‌ى ئه‌و زانیاریانه‌ى تایبه‌ت ده‌ست ئیراده‌ كه‌وتون، ئەمڕۆ شاندی هەرێم لەگەڵ تەیف سامی، له‌سه‌ر چەندین پرس ڕێککەوتنیان كردوه‌.

زانیارییه‌كان ده‌ڵێن، ڕێککەوتن كراوه‌ كه‌ پێداچونەوە بەبڕی داهاتی ناوخۆى هەرێم بکرێت، بۆ مانگەکانی 7 تا 12 واته‌ تاوه‌كو كۆتایی ئەمساڵ، ئەویش بەگوێره‌ى جیاکردنەوەو پۆلێنبەندی ئەو داهاتە فیدراڵییانەی کە لەهەرێم هەن.

ئیراده‌ ئه‌وه‌شى زانیوه‌، بابه‌تێكى نوێى نێو گفتوگۆكانى ئه‌مڕۆ، داهاتى ده‌روازه‌ سنوریه‌كان بوه‌و هه‌ردولاش واته‌ هه‌ولێرو به‌غدا ڕێكه‌وتنیان كردوه‌، بەپێی ئه‌و ڕێککەوتنەش، نیوەی داهاتی خاڵە سنورییەکانی هەرێم ڕادەستی بەغدا دەکرێت.

بۆ یه‌كلاكردنه‌وه‌ى هه‌موو كێشه‌كانیش، سه‌ره‌تاى هەفتەی داهاتوو، شاندى هەرێم ده‌چێته‌وه‌ به‌غداو لەگەڵ دارایی عیراق‌و لیژنە وزارییەکە کۆدەبێتەوەو داهاتی باج‌و ڕسوماتیش یەکلایی دەکەنەوە كه‌ ئه‌مڕۆ هیچ بڕیارێكى له‌باره‌وه‌ نه‌دراوه‌.

دواى ڕازیبونى هه‌رێم به‌پێدانى له‌50%ى داهاتى خاڵه‌ سنورییه‌كان‌و گومرگه‌كان به‌به‌غدا، حکومەتی عێراقیش ڕه‌زامه‌ندى نیشانداوه‌، لەدوای مانگی شەشەوە، بە 120 ملیار دینارەکەدا بچێتەوەو ڕازیبێت به‌وه‌ى هه‌رێم كه‌متر بداته‌ به‌غدا، بەڵام لەسەر هیچ ژمارەیەک ڕێکەوتنیان نه‌كردوه‌.

هه‌ر له‌و زانیاریانه‌ى ده‌ست ئیراده‌ كه‌وتون له‌باره‌ى موچه‌ى مانگى شه‌شه‌وه‌، له‌ئێستادا ته‌یف سامى چاوه‌ڕوانى نوسراوى سودانیه‌ بۆ خەرجکردنی موچەی مانگی شەش، دواى ئه‌و نوسراوه‌، ئینجا وه‌زیرى دارایی بڕیار ده‌دات به‌خەرجکردنی پارەی موچەی مانگی شەش.

زانیارییه‌كان وردتر ده‌ڵێن، پێشئه‌وه‌ى ته‌یف سامى بڕیارى خه‌رجكردنى موچه‌ بدات له‌دواى نوسراوه‌كه‌ى ئه‌نجومه‌نى وه‌زیرانى عێراقیش، ده‌بێت هه‌رێم 120 ملیاره‌كه‌ى ڕاده‌ستكردبێت‌و حكومه‌تى هه‌رێمیش كێشه‌كانى له‌گه‌ڵ كۆمپانیا نه‌وتیه‌كان كۆتایی پێهێنابێت.