شارەزایەکی ئابوری ئاستەنگەکانی نەوتی هەرێم ئاشکرادەکات

نەبیل مەرسومى پسپۆڕی بوارى ئابوری ئاشکرايکرد، دیارترین ئاستەنگەکانی بەردەم هەناردەکردنی نەوتی هەرێمی کوردستان ڕەزامەندیی كۆمەڵەى کۆمپانیا نەوتییە بیانییەکانە، کە بەردەوامن لە پێداگریی لەسەر بەرزکردنەوەی تێچوی بەرهەمهێنانی نەوت و ڕەتیدەکەینەوە هەناردەکردن بە تێچوی 16 دۆلار بۆ هەر بەرمیلێک؛ بچێتە بوارى جێبەجێكردنەوە.

مەرسومی لە پۆستێکیدا لە هەژماری تایبەتی خۆی لە تۆڕی کۆمەڵایەتی فەیسبوک كە ئیرادە بەدواداچونى بۆ كردوە؛ ئەوەى رونكردۆتەوە كە ئەو کۆمپانیایانە داوای دانپێدانانی گرێبەستە بازرگانییەکانیان لەلایەن بەغداوە دەكەن، سەرەڕاى گەرەنتیكردنى پارەدان لە بەرانبەر هەناردەكردنى نەوتى ڕابردو و داهاتو، هاوكات دەیانەوێت گواستنەوەی پارەی فرۆشتنی نەوت ڕاستەوخۆ بۆ کۆمپانیاكانى ئەندامانی کۆمەڵەکە رەوانەبكرێت و ڕێککەوتنی نوسراو لەگەڵ بەغدا ئیمزا بكرێت.

ئەو شارەزایە ئابورییە ئەوەشى خستۆتەڕو كە دوهەم بەربەست ڕەزامەندی تورکیایە بۆ دەستپێکردنەوەی پەمپکردنی نەوت لە ڕێگەی بۆری جەیهانەوە، چونكە ئەنقەرە پێویستی بە دەرکردنی ئاگادارییەکی فەرمی هەیە کە ئامادەیی خۆی بۆ دەستپێکردنی پرۆسەکە پشتڕاست بکاتەوە، لەبەرئەوە کاتێک ئەم ڕەزامەندییە بەدەستهێنرا، ئەوكاتە نەوتەکە لەناو خەزانەكانى بەندەری جەیهان هەڵدەگیرێت و کۆمپانیای سۆمۆ دەست بە فرۆشتنی دەکات.

ئەمەش لە کاتێکدایە کە هەوڵە بەردەوامەکان بۆ تێپەڕاندنی ئەو ئاستەنگانە و بەرزکردنەوەی هەناردەکردنی نەوت لە هەرێمی کوردستانەوە، یارمەتیدەر دەبێت لە پاڵپشتیکردنی ئابوریی هەرێمی و نیشتمانی.