لەچارەکی یەكەمى ئەمساڵدا هەناردەى عێراق 24 ملیار دۆلار بوه

بانکی ناوەندی عێراق ئاشکرایکرد، وڵاتەكە لە ماوەی چارەکی یەکەمی ساڵی 2025دا بە بەهای 24.112 ملیار دۆلار هەناردەکردنی کاڵاکانی بەدەستهێناوە، كە لەو پارەیەش بە هیچ جۆرێك  بڕى پارەى تێچوی کەشتیوانی و بیمە هەژمار نەكراوە.

بانکەکە لە ئامارێکدا کە ئیرادە وردبینى بۆ كردوە، رونیکردەوە کە هەناردەی نەوتی خاو زۆرترین پشکی پێکهێناوە، و بڕى پارەكەى گەیشتۆتە 22.365 ملیار دۆلار،  دواتر هەناردەی بەرهەمی موشتەقاتى نەوتی بە بەهای 1.182 ملیار دۆلار دێت، هاوکات بەهای هەناردەکردنی بەرهەمى نانەوتیى تەنها 564 ملیۆن دۆلار بوە.

لەدرێژەى داتا فەرمییەكانى بانكى ناوەندى عێراق دا ئەوەخراوەتەڕو كە بەهای هاوردەکردنی کاڵاکان بۆ هەمان ماوەی چارەكى یەكەمى ساڵ، گەیشتۆتە بڕى 21.362 ملیار دۆلار، کە ئەو ژمارەیەش لە نێوان هاوردەکردنی حکومەت بە بەهای 1.377 ملیار دۆلار و هاوردەکردنی کەرتی تایبەت بە بەهای 19.985 ملیار دۆلار دابەشکراوە.

بانکی ناوەندی ئاماژەی بەوەشکردوە، ئەم ژمارانە ڕەنگدانەوەی جوڵەی ئاڵوگۆڕی بازرگانییە لە ماوەی چارەکی یەکەمی ساڵدا و جیاوازی ئەرێنی هاوسەنگی بازرگانی لە بەرژەوەندی هەناردەکردندا نیشان دەدەن.