ڕێباز حه‌ملان: له‌م هه‌فته‌یه‌دا موچه‌ى مانگى شه‌ش دابه‌شده‌كرێت

یاریده‌ده‌رى سه‌رۆك وه‌زیرانى هه‌رێم بۆ كاروبارى دارایی ئاشكرایده‌كات، له‌م هه‌فته‌یه‌دا موچه‌ى مانگى شه‌شى فه‌رمانبه‌ران دابه‌شده‌كرێت.

به‌گوێره‌ى سه‌رچاوه‌كانى هه‌واڵ، ڕێککەوتنی نێوان هەولێرو بەغدا لەقۆناغی کۆتاییدایەو نوسراوی فەرمی بۆ خەرجکردنی موچەی مانگی شەش ئاراستەی وەزارەتی دارایی عێراق کراوەو چاوەڕواندەکرێت لەم هەفتەیەدا موچەی مانگی شەشی فەرمانبەرانی هەرێم خەرجبکرێت.

به‌گوێره‌ى هه‌واڵێكى میدیاى نزیك له‌سه‌رۆكى حكومه‌ت، ئەمڕۆ یەکشەممە محەممەد شیاع سودانی سەرۆک وەزیرانی عێراق، نوسراوی فەرمی بۆ خەرجکردنی موچەی مانگی شەش ئاراستەی وەزارەتی دارایی عێراق کردوەو تەیف سامی-ش وەزیری دارایی دەستیکردوە بە ڕێکارە کارگێڕییەکان بۆ ناردنی پارەکە.

ئه‌مه‌ش له‌كاتێكدایه‌ شه‌وى ڕابردوو شاندێکی شەش کەسیی له‌حكومه‌تى هەرێم خۆیان گه‌یانده‌ بەغدا بۆ چارەسەرکردنی کێشە هەڵپەسێردراوەکان.

دوو سەرچاوەی باڵا لەوەزارەتی نەوتی عێراق‌و کۆمپانیای سۆمۆ وتویانه‌، "کێشەی هەناردەکردنەوەی نەوتی هەرێم چارەسەرکراوەو تەنها چەند ڕێکارێکی کارگێڕیی ماوە بۆ دەستپێکردنەوەی پرۆسەکە لەنزیکترینکاتدا".

هاوكات حکومەتی هەرێم له‌كۆبونه‌وه‌كاندا له‌گه‌ڵ به‌غدا، ڕەزامەندیی نیشانداوە مانگانە ڕێژەی 50%ی داهاتەکانی گومرگ‌و دەروازە سنورییەکان‌و فڕۆکەخانەکان، ڕادەستی بەغدا بکات.

ئه‌وه‌ زانراوه‌ وه‌ك خاڵی ناکۆکى نێوان هه‌ولێرو به‌غدا، ته‌نها لەسەر داهاتی ناوخۆیی باج‌و ڕسوماتە، حکومەتی عێراق داوای 100% ئەو داهاتانە دەکات، بەڵام حکومەتی هەرێم ئەمە ڕەتیكردوه‌ته‌وه‌و جه‌ختیكردوه‌ته‌وه‌، بەپێی یاسای بودجە، تەواوی ئەو داهاتانە مافی خۆیەتی بۆ بەڕێوەبردنی کاروباری وەزارەت‌و فەرمانگەکان‌و خەرجیی پڕۆژەکان.

پێشتر حكومه‌تى هه‌رێم ڕایگه‌یاندبوو، مانگانە پێویستی بە 230 ملیار دینار هەیە بۆ خەرجییەکانی بەکاربردن‌و پڕۆژەکان.

هه‌ر له‌باره‌ى موچه‌ى موچه‌خۆرانى هه‌رێمیشه‌وه‌، ڕێباز حەملان یاریدەدەری سەرۆک وەزیرانی هه‌رێم ئاشكرایكردوه‌، "پرسی نەوت‌و داهاتی گومرگی یەکلاییکراوەتەوەو گفتوگۆکان لەسەر پرسی باج‌و ڕسومات بەردەوامن، به‌ڵام بڕیارە لەم هەفتەیەدا موچەی مانگی شەش دابەشبکرێت".

لێدوانه‌كه‌ى حه‌ملان بۆ دابه‌شكردنى موچه‌ له‌كاتێكدایه‌، ئه‌مڕۆ 24ى 8ى 2025، به‌ڵام فه‌رمانبه‌ران‌و موچه‌خۆرانى هه‌رێم موچه‌ى مانگى شه‌ش-یان وه‌رنه‌گرتوه‌.