سبه‌ینێ له‌به‌غداوه‌ بڕیار له‌موچه‌ى هه‌رێم ده‌درێت

بڕیاروایه‌ سبه‌ینێ سێشه‌ممه‌، ئەنجومەنی وەزیرانی عێراق کۆببێتەوەو تێیدا ڕاپۆرتێک لەبارەی پابەندییە داراییەکانی نێوان هەرێم‌و حکومەتی فیدراڵی بخرێتەڕوو بڕیارى کۆتایش لەبارەى ناردنى موچەوە بدرێت.

سەرچاوەیەکی باڵای نێو حکومەتی عیراق ئاشكرایكردوه‌، پرسی نەوت‌و خەرجکردنی موچەی هەرێم، وەک بابەتێکی سەرەکی لەکارنامەی دانیشتنەکەی سبەینێی ئەنجومەنی وەزیرانی عیراقدا جێگیرکراوە.

زانیارییەکان باس له‌وه‌ده‌كه‌ن، بڕیارە لەدانیشتنەکەی سبەینێدا گفتوگۆ لەبارەی ئەم دوو پرسە بکرێت‌و هەوڵبدرێت بڕیاری پێویست لەسەریان بدرێت.

لەلایەکى دیکەوە سەرچاوەیەکی باڵاى عێراقى ئەمڕۆ دوشەممە ئاماژه‌ى به‌وه‌دابوو، دوو بڕگەی نوێ وەک پاشکۆ خراونەتە نێو کارنامەی کۆبونەوەی سبەینێى ئەنجومەنی وەزیران کە کاتژمێر یه‌كى دوای نیوەڕۆ بەڕێوەدەچێت.

بەوتەی سەرچاوەکە، هەردوو بڕگەکە لەسەر داوای وەزارەتی دارایی عێراقە، یەکێکیان تایبەتە بەخستنەڕوی پابەندییە داراییەکانی نێوان حکومەتی هەرێم‌و حکومەتی فیدراڵی، بۆ ئەو مەبەستەش، ڕاپۆرتێکی هاوبەش لەلایەن محەممەد عەلی تەمیم جێگری سەرۆک وەزیران‌و وەزیری پلاندانان؛ تەیف سامی وەزیری دارایی‌و بەنگین ڕێکانی وەزیری ئاوەدانکردنەوەو نیشتەجێکردن‌و شارەوانییەکان پێشکه‌شدەکرێت.

سەرچاوەکە ئاماژەی بەوەکرد، لەسەر بنەمای ئەو ڕاپۆرتە چاوەڕواندەکرێت سبەینێ ئەنجومەنی وەزیران بڕیار لەسەر ناردنی موچەی فەرمانبەران‌و موچەخۆرانی هەرێمی کوردستان بدات.

تائێستا فەرمانبەران‌و موچەخۆرانی هەرێم موچەی مانگی 6ی ئەمساڵیان وەرنەگرتوە، لەکاتێکدا لەعێراق دابەشکردنی موچەی مانگ 8 دەستیپێکردوە.