ئەنجومەنی وەزیرانی عێراق ڕەزامەندی لەسەر ناردنی موچەی مانگی شەش دا

ناوەندی هەواڵ

ئەنجومەنی وەزیرانی عێراق بڕیاری خەرجکردنی موچەی مانگی شەشی فەرمانبەرانی هەرێمی کوردستانی دەركرد.

ئەمڕۆ سێشەممەدا، 26ی ئابی 2025،، ئەنجومەنی وەزیرانی عێراق کۆبوونەوەی ئاسایی خۆی ئەنجامدا کە یەکێک لە تەوەرەکانی کارنامەکەی، پرسی موچەی مانگی حوزەیران (شەش)ی هەرێم و هەناردەکردنەوەی نەوت بوو.

بەپێی زانیارییەکانی"ئیرادە" لە پەراوێزی کۆبوونەوەکەی ئەنجومەنی وەزیراندا  باسی موچەی فەرمانبەرانی کوردستان کراوەو دواتر بە دەنگدان ئەنجومەنی وەزیرانی عێراق ڕەزامەندی لەسەر خەرج کردنی موچەی مانگی شەشی فەرمانبەرانی کوردستان داوە، بەو مەرجەی هەرێمی کوردستان بڕی 120 ملیار دینار وەکو داهاتی بەشی گەنجینەی فیدراڵی بداتە بەغدا.

سەرچاوەیەک لە وەزارەتی دارایی هەرێم ڕایگەیاندووە، دوای ڕەزامەندی ئەنجومەنی وەزیرانی عێراق ئەوان ئامادەن بۆ ناردنی 120 ملیاری داهاتی ناوخۆ بۆ بەغدا. 
لە ماوەی 100 ڕۆژی ڕابردوودا، فەرمانبەرانی هەرێم تەنها یەک موچەیان وەرگرتووە؛ کۆتاجار 24ی تەمموز،لەلایەن عێراقەوە موچەی مانگی ئایار نێردرا و  دواتر دابەشکرا.