یەکخستنی غەرامەى هەولێرو بەغدا بازاڕى ئۆتۆمبێل ئیفلیج دەكات

پوختە

لەكاتێك دا لە ماوەكانى پێشتردا لەسەر شەقامەکانی سلێمانی و هەولێر پێشانگاکانی ئۆتۆمبێل پڕ بون لە سەودا و مامەڵە، بەڵام لە ئێستادا بەهۆى یەکخستنی غەرامە لەنێوان بەغداو هەولێر؛ بازاڕى ئۆتۆمبێل  زیاتر لە بازاڕێکی چۆڵ دەچێت، چونكە لە دواى ئەو بڕیارە پاشەكشەیەكى بەرچاو لەلایەن كڕیارە عەرەبەكانەوە دروستبوە، بەهۆى ئەوەى عەرەبەكان هەفتانە سەردانى پارێزگاكانى ناوەڕاست و باشور دەكەن.

بە بڕواى پسپۆڕانى ئابورى، قەیرانەکە چیتر تەنها هێوربونەوەیەکی تێپەڕ نییە لە کڕین و فرۆشتندا؛ بەڵكو بۆتە نیشانەی گرژبونێکی قوڵی ئابوری و کۆمەڵایەتی.

دواكەوتنى موچەو قەیرانى دارایى چ كاریگەرییەكى لەسەر بازاڕى ئۆتۆمبێل هەبوە؟

ئارام فەخرەدین، ئەندامی سەندیکای پێشانگاکانی ئۆتۆمبێل لە سلێمانی لە لێدوانێكى رۆژنامەوانیى دا رایگەیاند، قەیرانی دارایی و دواکەوتنی موچە وایکردوە فەرمانبەران نەتوانن ئۆتۆمبێلەکانیان بگۆڕن یان بیر لە کڕینی ئۆتۆمبێلی نوێ بکەنەوە، ئەمەش هۆکاری سەرەکی داڕمانی خواستی ناوخۆییە، بەڵام قەیرانەکە ڕەگ و ڕیشەی لە هۆکاری دیکە و ئاڵۆزتردا هەیە، ئەویش ئەوەیە پێشانگە تەقلیدییەکان ڕوبەڕوی داگیرکارییەکی بەرفراوانی ئۆتۆمبێلی چینی بونەتەوە، کە بازاڕەکە بە ئۆفەری قیست نقوم دەکات و بژاردەی وەسوەسەئامێز پێشکەش دەکەن کە ئابوریناسان وەک "گۆڕانکاری رێساى یاری" وەسفی دەکەن، بێگومان ئەوەش لە بازاڕێکدا کە پێشتر پشتی بە پارەدانی كاش دەبەست.

ئایا هۆكار تەنها قەیرانى موچەو ئۆفەرى ئۆتۆمبێلە چینییەكانە؟

بە وتەی شارەزایانی ئابوری، هۆکارەکان تەنیا بە قەیرانی موچە یان ئۆفەرى ئۆتۆمبێلە چینییەکان سنوردار نین، بەڵكو بڕیاری ئەم دواییەی حکومەتى هەرێم بۆ یەکخستنی غەرامە لە نێوان بەغدا و هەولێر؛ وایکردوە ئەو ئۆتۆمبێلانەی تابلۆی هەرێمی کوردستانیان لەسەرە لە پارێزگاکانی ناوەڕاست و باشور کەمتر سەرنجڕاکێش بن، ئەگەرچى ئەم ئۆتۆمبێلانە سەردەمانێک بەهۆی نەبونى غەرامە لە پارێزگاكانى ترى عێراق بە قازانج دادەنران، بەڵام ئێستا بونەتە بارگرانییەک بۆ کڕیارانی دەرەوەی کوردستان، ئەمەش بۆتە هۆی دابەزینی چالاکیی فرۆشتن، کە پێشتر هێڵێکی ژیانی سەرەکی بو بۆ پێشانگاکانی هەرێم.

شارەزایانی بواری گواستنەوە ئاماژە بەوەشدەکەن کە قەیرانەکانی ناوچەکە ڕۆڵێکی دیکەیان هەبوە، لەوانە نادڵنیایی ئابورى و نادڵنیایی سیاسی، لەگەڵ هەڵاوسانی نرخی سوتەمەنی جیهانی، وایکردوە وەبەرهێنەران و هاوڵاتییان پێیان باشترە "پارەکانیان لە ماڵەوە تەجمید بكەن" نەک بەشداری گرێبەستی ئۆتۆمبێل یان خانوبەرە بکەن، لەبەرئەوە ئەم چەقبەستنە ڕەنگدانەوەی قەیرانێکی فراوانتری متمانەیە، نەک تەنها قەیرانی بازاڕی ناوخۆیی.

بۆچى كڕیارانى عەرەب دودڵن لە كڕینى ئۆتۆمبێلەكانى هەرێم؟

بەپێى وتەى ئەو فرۆشیارانەى لە پێشانگاكانى ئۆتۆمبێل كاردەكەن، پێشتر ئۆتۆمبێلەكانى هەرێم كاتێك دەچونە بەغدا و شارەكانى تر بەهۆى جیاوازى تابلۆكان و ئیدارەكانەوە سەرپێچییان بۆ تۆمار نەدەكرا، لەبەرئەوە عەرەب كاتێك لە كوردستان ئۆتۆمبێلى دەكڕى لە بەڕێوەبەرایەتییەكانى هاتوچۆى سلێمانى و هەولێرو دهۆك تابلۆكانیان تۆمار دەكرد، بۆئەوەى كاتێك دەگەڕێنەوە بۆ پارێزگاكانى ناوەڕاست و باشور، سەرپێچییان بۆ تۆمارنەكرێت، بەڵام لە ئێستادا بەهۆی ئەو بڕیارەوە كە سزاى سەرپێچى و غەرامە لەنێوان هەردو حكومەتى هەولێرو بەغدا یەكخراوە، كاریگەرییەكى بەرفراوانى لەسەر خواستى عەرەب بۆ ئۆتۆمبێلى تابلۆى شارەكانى كوردستان دروستكردوە.