سودانى نوسراوى خه‌رجكردنى موچه‌ ئاراسته‌ى ته‌یف سامى ده‌كات

به‌گوێره‌ى ئه‌و زانیاریانه‌ى له‌به‌غداوه‌ ئاشكراكراون، بەفەرمی نوسراوی خەرجکردنی موچەی مانگی شەش له‌لایه‌ن سودانیه‌وه‌ ئاراستەی وەزارەتی دارایی عێراق‌و ته‌یف سامى کراوه‌.
 
میدیاى عێراقى ڕایگه‌یاندوه‌، ئەمێندارێتیی ئەنجومەنی وەزیران، نوسراوەکەی بۆ وەزارەتی دارایی عێراق ناردوە.
 
سه‌رچاوه‌كان وتویانه‌، ماوەتەوە تەیف سامی وەزیری دارایی عێراق واژۆ لەسەر نوسراوەکە بکات بۆ خەرجکردن‌و گواستنەوەی بڕی پارەکە بۆ سەر هەژماری وەزارەتی دارایی هەرێم.
 
ئیراده‌ زانیویه‌تى، چاوەڕواندەکرێت سبەی پێنجشەممە، تەیف سامی واژۆ لەسەر نوسراوەکە بکات، به‌ڵام واژۆكردنه‌كه‌ ده‌كه‌وێته‌ دواى ناردنى بڕى 120 ملیاره‌كه‌ى هه‌رێم بۆ به‌غدا.

به‌پێى زانیارییه‌كانى ئیراده‌، سبەینێ پێنجشه‌ممه‌، کاتژمێر (9)ى به‌یانى، وه‌زاره‌تى دارایی هه‌رێم بڕی (120) ملیار دینار ڕادەستی بەغدا ده‌كات‌و له‌دواى ئه‌وكاته‌شه‌وه‌، ڕاسته‌وخۆ ته‌یف سامى واژۆكه‌ى ده‌كات‌و پاره‌كه‌ ده‌گوازرێته‌وه‌سه‌ر هه‌ژمارى وه‌زاره‌تى دارایی هه‌رێم.
 
دوێنێ، ئەنجومەنی وەزیرانی عێراق بڕیاریدا موچەی مانگی حوزەیرانی موچەخۆرانی هەرێم بنێرێت، بەڵام ناردنەکەی بەڕادەستکردنی 120 ملیار دینار لەداهاتی ناوخۆى هەرێمه‌وه‌ بەسته‌وه‌.
 
ئه‌مڕۆ 105 ڕۆژه‌، فه‌رمانبه‌ران‌و موچه‌خۆرانى هه‌رێمى كوردستان ته‌نها یه‌ك موچه‌یان بۆ مانگى پێنج وه‌رگرتوه‌، سبه‌ینێ 28ى 7ى 2025، به‌ڵام موچه‌خۆران له‌چاوه‌ڕوانى وه‌رگرتنى موچه‌ى مانگى شه‌شدان.