واژۆ لەسەر ناردنی موچە بۆ فەرمانبەرانی هەرێم کرا

ناوەندی هەواڵ

دوای ناردنی 120 ملیار دینارەکەی هەرێم بۆ سەر هەژماری بانکی وەزارەتی دارایی حکومەتی فیدراڵ، تەیف سامی نوسراوی خەرجکردنی موچەی بۆ فەرمانبەرانی هەرێم واژۆ کرد، بەو پێیەش بڕیارە سەرەتای هەفتەی داهاتوو پارە بگاتە هەرێمی کوردستان.

بەپێی زانیارییەکانی ئیردە، دوای واژۆ کردنی نوسراوی خەرجکردنی موچەی فەرمانبەرانی هەرێم ، وەزیری دارایی عێراق نوسراوی خەرجکردنی مووچەی مانگی شەشی ئاراستەی بەڕێوەبەری ژمێریاری وەزارەتەکەی کردووە، بەڵام بەهۆی ئەوەی " بەحساب " بەڕێوەبەری ژمێریاری ئەو وەزارەتە زووتر لە دەوام دەرچووە ! پێدەچێت پارەکە ڕۆژی یەکشەممە و دووشەمەی هەفتەی داهاتوو بگاتە هەرێمی کوردستان.

لەگەڵ هەموو ئەوانەدا سەرچاوەیەک لەوەزارەتی دارایی هەرێم بە ئیرادەی وت،هەر کاتێک پارە بۆ موچە بگات ڕاستەوخۆ لیستی موچە ڕادەگەیەنرێت و دەست بە دابەش کردنی موچە دەکرێت و خشتەی دابەشکردنی موچەکەش هاوشێوەی مانگی ڕابردووە و بەچەند ڕۆژێک دابەش دەکرێت.
دواخستنی مووچەو دەستی دەستی هەردوو حکومەتی هەرێم و بەغداد لەکاتێکدایە 89 ڕۆژە موچەی فەرمانبەرانی هەرێم دواکەوتووە بەڵام وەزیرانی دارای هەردوو حکومەت زۆرجار بە هۆی بیانوویەکی بێ مانای وەک دەرچوونی بەڕێوەبەرێک لە وەزارەت ئامادەن دەیان ڕۆژ مووچەی یەک ملیۆن هاوڵاتی دوابخەن کە 89 ڕۆژە دواکەوتووە.