کەرتی نەوت گۆڕانکاری بەخۆیەوە دەبینێت؛ شاماران و گەڵف کیستۆن یەکدەگرن و ڕوو لە کێڵگەی حەمرین دەکەن

بە یەکگرتنی مێژوویی شاماران و گەڵف کیستۆن بە بەهای زیاتر لە یەک ملیار دۆلار کەرتی نەوت لە هەرێمی کوردستان و عێراق گۆڕانکاری بەخۆوە دەبینێت، کۆمپانیا نەوتییەکان پەرە بە کارەکانیان لە هەرێمی کوردستان و ناوەڕاستی عێراق دەدەن.

لە هەنگاوێکی گەورە و ستراتیژیدا لە کەرتی نەوتی هەرێمی کوردستان و عێراقدا، هەردوو کۆمپانیای نەوتیی "شاماران" (Shamaran Petroleum) و "گەڵف کیستۆن" (Gulf Keystone Petroleum) ڕێککەوتنی یەکگرتنی گشتگیریان واژۆ کرد بۆ دروستکردنی یەکێک لە ١٠ گەورەترین کۆمپانیا سەربەخۆکانی بەرهەمهێنانی نەوت لەسەر ئاستی ئەورووپا، بە بەهای بازاڕی کە لە یەک ملیار دۆلار تێدەپەڕێت.

رۆژی ٢٠ی تشرینی یەکەمی ٢٠٢٦، کۆمپانیای شاماران دوو هەنگاوی گەورەی ڕاگەیاند: یەکەمیان کڕینی ٢٥٪ـی پشکەکانی کۆمپانیای (HKN Hamrin) و چوونە ناو کێڵگەی نەوتی حەمرین لە ناوەڕاستی عێراق، و دووەمیان یەکگرتنی تەواوەتی لەگەڵ کۆمپانیای گەڵف کیستۆن.

وەبەرهێنان لە کێڵگەی حەمرین

 شاماران بە بڕی ٣٥ ملیۆن دۆلاری سەرەتایی و ١٥ ملیۆن دۆلاری دیکە لە ڕەوتی نەختی، ٢٥٪ـی پشکەکانی کێڵگەی حەمرینی بەدەست هێنا کە یەدەگەکەی لە نێوان ٥٠٠ ملیۆن بۆ یەک ملیار بەرمیل دەخەمڵێندرێت. پلان دانراوە بەرهەمهێنانی کێڵگەکە لە ٢٠ هەزار بەرمیلەوە بۆ ٦٠ هەزار بەرمیل لە ڕۆژێکدا تا ساڵی ٢٠٢٨ بەرز بکرێتەوە.

پێکهاتەی یەکگرتنەکە

هەردوو کۆمپانیا لە قەوارەیەکی یاساییدا یەکدەخرێن کە بە ناوی گەڵف کیستۆن دەمێنێتەوە، بەڵام بە پێکهاتەیەکی نوێوە کە پشکەکانی بە شێوەی ٥٠٪ بە ٥٠٪ لە نێوان پشکدارانی پێشووی هەردوو کۆمپانیادا دابەش دەبن. ویلیام لوندین دەبێتە سەرۆکی ئەنجوومەنی کارگێڕی و جۆن هاریس وەک بەڕێوەبەری جێبەجێکار (CEO) بەردەوام دەبێت، هەروەها پشکەکانی کۆمپانیا لە بۆرسەی ئۆسلۆ (نەرویج) لیست دەکرێن.

کۆنتڕۆڵکردنی چوار کێڵگەی ستراتیژی

 کۆمپانیا نوێیەکە چوار کێڵگەی گرنگی نەوتی لەخۆ دەگرێت کە بریتیین لە: (شێخان، ئەترووش، سەرسەنگ و حەمرین)، بە کۆی یەدەگی سەلمێنراوی ٣٢٣ ملیۆن بەرمیل نەوت و بەرهەمهێنانی ٥٣ هەزار بەرمیل لە ڕۆژێکدا. چاوەڕوان دەکرێت پرۆسەی تێکەڵبوونەکە لە ناوەڕاستی ساڵی ٢٠٢٧ و دوای وەرگرتنی ڕەزامەندییە یاساییەکان و حکومەتی هەرێمی کوردستان بە تەواوەتی کۆتایی بێت.