نەسریەى زەبەلاحى نەوەى چوارەمى بارزانى خەڵك برسیتر دەكات

پوختە

دواى ئەوەى دوێنى لیژنە هونەرییەكانى تایبەت بە لێكۆڵینەوە لە داهاتى ناوخۆ و نەوت و تەوتین  بە محەممەد شەییاع سودانى سەرۆكوەزیرانى عێراقیان راگەیاند؛ "هەرێم یارمەتیدەر نییە"، پارتى بە یەكجارى دەرگاى رێككەوتن و لێكتێگەیشتنەكانى نێوان هەرێم و بەغداى داخست و موچەخۆران و تەنانەت كاسبكارانیشى نائومێد كرد.

ئەم هەڵوێستە پڕ لە بێباكییەى پارتى؛ كوردستان روبەڕوى برسێتییەكى كوشندە دەكاتەوەو وەك لە راپۆرتەكانى پێشوى ئیرادە ئاماژەمان پێداوە تەنانەت لەناو بازاڕو شوێنە بازرگانییەكانیشدا چەندین كارگەو كۆگاو دوكان و گەنجینە داخراون و بێ موچەیى قەیرانێكى تائەوپەڕى كارەساتبارى لێكەوتۆتەوەو بە موچەیەكى مانگى پێنچ كە تەنها دراوەتەوە بە چارەكێكى قەرزى فەرمانبەران و موچەخۆران، رقى توڕەيى خەڵك دانامركێتەوەو ئەمجارە چاوەڕێى تەقینەوەیەكى یەكجارەكى گەورە دەكرێت.

بۆچى نەسریەى كوڕانى نەوەى چوارەمى بارزانى نابێت كەم بكات؟

پارتى لە ئێستادا سیاسەتێكى توندى برسیكردن و زەلیلكردنى خەڵكى هەرێم پیادە دەكات، ئەو لاى گرنگ نییە خەڵك توشى برسێتى و كێشەى كۆمەڵایەتى و نەهامەتى بێتەوە، بەڵكو ئەوەى گرنگە لاى ئەوەیە موچەى دەزگا میدیاییە سێبەرەكانى دەست كوڕانى نەوەى چوارەمى بنەماڵەكەى و زانكۆ ئەمریكییە گاڵتەجاڕەكانیان كە  تەنها كوڕانى بنەماڵەى خۆیان تێیدا پلەى یەكەم وەردەگرن و رەوانەى دەرەوەى وڵات دەكرێن و كۆمپانیا زەبەلاحەكانیان كە بۆ روتانەوەى زیاترى خەڵك دایانناوە؛ بێ موچە نەبن.

پارتى نایەوێت نەسریەى زەبەلاحى بەردەم ئارین و ئیدریس ببڕدرێت، هەربۆیە تەنها بۆ یەك مانگ ئامادەبو وەك بەنجێكى كاتى بۆ دامركاندنەوەى رقى پیشخواردوى خەڵك، تەنازول بۆ موچەیەكى بەغدا بكات و هەرچۆنێك بێت بە حیسابى خۆیان خەڵكیان لە پەلەقاژەى مەرگ و برسێتى رزگاركردوە.

بۆچى پارتى رێككەوتنەكەى نێوان هەرێم و بەغداى تێكدا؟

بەپێى زانیارییە میدیاییەكان، پارتى بە هیچ جۆرێك ئامادە نییە بڕى 230 هەزار بەرمیل نەوتى رۆژانە رەوانەى سۆمۆ بكات و تەنها بۆ موچەى مانگى حوزەیرانیش دەیەوێت بڕى 120 ملیار دینار بنێرێت و وتوشیەتى: ناتوانین پابەندى ئەو بڕە پارە زۆرەبین، لە كاتێكدا بەغدا دەڵێت: بەو داهاتەو بەو بڕە نەوتە؛ موچەى تەواوى خەڵكى كوردستان دەدەم ئەگەر تەنانەت نەوتەكەش ساغ نەبێتەوە، بەڵام پارتى بە سێ هێندە داهاتى ناوخۆ و سێ هێندەى بڕە نەوتەكەش ئامادە نییە چارەكە موچەیەكیش بدات.

بۆچى پارتى رقى لە خەڵكە؟

پارتى باش دەزانێت كە هیچ بنكەیەكى جەماوەریى لەسەر ئاستى كوردستان نییەو زۆرینەى خەڵك رقى لێیەتى، بەڵام تەنها چەند كەناڵێكى سێبەرى خۆى لەرێى كۆمەڵە كەسانێكى سودمەندەوە ماكیاژى بەردەوام بۆ كارە هەڵەكانى پارتى دەكەن و وەك هێزێكى گەورەو كاریگەر وێناى دەكەن، كە لێرەدا بێ هەڵوێستیى سەرجەم حزبە كوردییەكانیش یاریدەدەر بوە لەو دۆخە ناشرینەدا كە پارتى خوڵقاندویەتى.

پارتى ئەوەش دەزانێت تەنها ئەو بڕە پارەیەى بەدەستەوەیە كە بەغدا دەینێرێت وەك موچەو ئەگەر هاتو تەوتین بكرێت و هەژمارى من لە هاوكێشە داراییەكان دوربخرێتەوە، ئەوا شتێك نامێنێت بە ناوى حكومەتى هەرێم و پارتى، چونكە چەكى دەستى ئەو حزبە برسیكردنى خەڵك و چەوساندنەوەیەتى، كەواتە پارتى لە ئێستادا وازى لە دەوڵەتى كوردى هێناوە، بەڵام واز لە هەژمارى من ناهێنێت، چونكە لە رێى تەوتینەوە ئەگەر بەغدا موچە بخاتە سەر هەژمارى فەرمانبەران؛ ئەوا هیچ موچەخۆرێك ئامادە نییە لە هیچ پرس و رایەك دا گوێى لە پارتى بگرێت و هاوكات موچەى دامودەزگا میدیایى و زانكۆ و كۆمپانیا وەهمییە زیادەكانى دەستى كوڕانى نەوەى چوارەمى بارزانى دەكەونە مەترسییەوە.