مەزڵوم عەبدى: مەركەزییەت بە كەڵكى سوریا نایەت

چەناڵى "یەنى یەشام" ى توركى چاوپێكەوتنێك لە گەڵ مەزڵوم عەبدى فەرماندەی گشتی هێزەكانی سوریای دیموكرات "هەسەدە" سازدەكات و ناوبراویش لەو چاوپێكەوتنەدا دەڵێت: چیتر دەسەڵاتى مەركەزییەت بەكەڵكی سوریا نایەت و دۆخى ناوخۆیى سوریا وادەخوازێت كە لامەركەزیى بێت، بەڵام لەگەڵ ئەوەشدا پێداگریى دەكەین لەوەى شەڕڤانەكانمان ببنە بەشێك لە سوپاى سوریا.

مەزڵوم عەبدى، لەو چاوپێكەوتنەدا ئەوەشى ئاشكراكردوە كە  پێشتر سوریا بەهۆى بیروباوەڕى بەعسەوە لەسەر بنەماى ئایدیایەكى قەومى و نەتەوەپەرستی دامەزرابو، بەڵام لە ئێستادا ئەو بنەمایە گۆڕاوە بۆ بیرۆكەیەكى  نەتەوەپەرستیی ئیسلامی.

سەبارەت بە ناكۆكییە سیاسییەكان و ململانێ سەربازییەكانى ناوخۆى سوریا مەزڵوم عەبدى لە چاوپێكەوتنەكەدا ئەوەی خستەڕو، كە ئەگەری ئەوە هەبوە شەڕ لە نێوان کورد و عەرەب، دواتر عەلەوی و عەرەبی سوننەدا هەڵبگیرسێت، بەڵام ئێمە بەردەوام ویستومانە لەرێى گەیشتن بە رێككەوتنێكى گشتگیر ئەو گرژى و بەستەڵەكانە نەهێڵین، ئەگەرچى ڕێککەوتنەکەی 10ى ئادار بە ڕەزامەندیی تورکیا نەبوە، بەڵام وا دیارە کە ڕێگریشیان لێ نەکردوە.

سەبارەت بە پەیوەندى ساردوسڕى نێوان هەسەدە و توركیا، مەزڵوم عەبدى رایگەیاند، لەجیاتى ئەوەى تێگەیشتنى جیاواز بۆ كێشەكان بكرێت، دەرفەتى ئەوەمان هەیە راستەوخۆ قسە لەسەر كێشەكان بكەین، توركیا وتویەتى: پێویستە ئێمەو دیمەشق رێكبكەوین و رێككەوتنى 10ى ئادار جێبەجێبكرێت، ئێمە لاى خۆمانەوە دركمان بەوە كردوە  كە بۆچونەکانی تورکیا سەبارەت بە هێزە سەربازییەکانی هەسەدە ناكۆكەو یەكناگرێتەوە.

سەبارەت بە مێژوى سیاسى سوریا، فەرماندەی گشتی هێزەكانی سوریای دیموكرات "هەسەدە" ئەوەى وێناكرد كە ئەو مێژوە پرۆسەیەكى پڕ لە گۆڕانكارییە، هەر گۆڕانكارییەك لە دۆخى سوریادا روبدات، كاریگەریى راستەوخۆى لەسەر رۆژهەڵاتى ناوەڕاست و سیاسەتى ئەو ناوچەیە دەبێت.

مەزڵوم عەبدى هەر لە درێژەى چاوپێكەوتنەكەیدا ئەو راستییەى دركاندوە كە تا ئەوكاتەى حكومەتى سوریا حكومەتێكى مەركەزیى بوەو دەسەڵات لە دیمەشق دا كۆبوبۆوە، رژێمێكى دیكتاتۆريى و شمولى و تۆتالیتێر بوە.

 فەرماندەی گشتی هێزەكانی سوریای دیموكرات پێیوایە؛ دواى 14 ساڵ لە شەڕى ناوخۆیى سوریا، ئیتر زۆر قورسە وڵات بەو شێوەیە بەڕێوەبچێت و وڵاتەكە پێویستى بە گۆڕانكاریى تەواوە؛ بەجۆرێك كە دەبێت لەسەر بنەماى لامەركەزیى بێت.

 بە بۆچونى مەزڵوم عەبدى، لەم ماوەیەى پێشودا سوریا بەرەو شەڕێكى خوێناوى ناوخۆیى دەچو، هەربۆیە پێویست بو كە هەسەدە و دیمەشق رێكبكەون و ئاگربەست رابگەیەندرێت.