قەیرانێکی دیپلۆماسی لە عێراق؛ ململانێی یەکێتی و پارتی پێشوازیی باڵیۆزی ١٠ وڵاتی پەکخستووە

ناکۆکییەکانی پارتی دیموکراتی کوردستان و یەکێتیی نیشتمانیی کوردستان، گەیشتووەتە ئەوەی لەسەر ئاستی عێراقیش کێشەی دروستکردووە.

ململانێ سیاسییەکانی نێوان یەکێتیی نیشتمانیی کوردستان و پارتی دیموکراتی کوردستان ڕەهەندێکی نوێی وەگرتووە و گەیشتووەتە ئاستی تێکدانی ڕێکارە دیپلۆماسی و پرۆتۆکۆڵییەکانی عێراق؛ بە جۆرێک بەهۆی ناکۆکیی بەردەوامی نێوان سەرۆک کۆمار و وەزیری دەرەوە، پێشکەشکردنی کارنامەی دەستبەكاربوونی باڵیۆزی ١٠ وڵاتی بیانی چەند مانگێکە بە تەواوی وەستاوە و باڵیۆزەکان لە هۆتێل ڕەشید لە ناوەڕاستی شاری بەغدا لە چاوەڕوانیی یەکجاریی چارەسەرکردنی ئەم قەیرانەدا ماونەتەوە.

بەپێی ڕاپۆرتێکی ڕۆژنامەی "عەرەبی جەدید"ی قەتەری، لەگەڵ ئەوەی بەپێی ڕێوشوێنە پرۆتۆکۆڵییە فەرمییەکان مەرجە وەزیری دەرەوە شانبەشانی سەرۆک کۆمار لە کۆشکی سەلام ئامادە بێت لە کاتی پێشکەشکردنی بڕوانامەی باڵیۆزە نوێیەکاندا، بەڵام فوئاد حسێن، وەزیری دەرەوە، ڕەتیدەکاتەوە بەشداری لەو ڕێوڕەسمانەدا بکات و تەنها پێشنیازی ناردنی بریکارێک یان جێگرێکی کردووە لەبری خۆی.

لە بەرامبەردا، سەرۆکایەتیی کۆمار کە لە پشکی یەکێتییە، ئەم پێشنیازەی بە توندی ڕەتکردووەتەوە و پێداگری لەسەر ئامادەبوونی کەسی وەزیر کردووە. ئەم دۆخە نەرێنییە بووەتە هۆی ئەوەی باڵیۆزەکانی وڵاتانی وەک کەنەدا، فەرەنسا، چین، سویسرا، میسر، تایلەند، مالیزیا، ئەلبانیا، قوبرس و ئیستۆنیا ماوەیەکی زۆرە نەتوانن کارنامەکانیان پێشکەش بکەن.

لە بەرامبەر ئەم قەیرانە قورسەدا، ئیڤان فایق، ئەندامی لیژنەی پەیوەندییەکانی دەرەوە لە ئەنجومەنی نوەرانی عێراق، هۆشداریی توندی دا کە درێژبوونەوەی ئەم ناکۆکییە حزبی و کەسییانە هەڕەشەیەکی ڕژد بۆ دروستبوونی قەیرانێکی گەورەی دیپلۆماسی لەگەڵ ئەو وڵاتانەدا دروست دەکات، و جەختیکردەوە کە پرۆسەی دیپلۆماسی نابێت قوربانیی ململانێی سیاسی بکرێت. ناوبراو ئاماژەی بەوەش دا کە سەرەڕای ناردنی نووسراوی فەرمی بۆ وەزیری دەرەوە، هیچ وەڵامێکی گونجاو نەدراوەتەوە، بۆیە لیژنەکەیان بە فەرمی داوای لە سەرۆک وەزیران کردووە دەستوەردانی بەپەلە بکات بۆ کۆتاییهێنان بەم بەربەستە دیپلۆماسییە.