یەکێتی سێ پۆستی لە حکومەتی خۆجێی نەینەوا وەرگرت

ئەنجومەنی پارێزگای نەینەوا کۆبووەوە و گۆڕانکاریی لە 20 پۆستی حکومەتی خۆجێیدا کرد و یەکێتی سێ پۆستی وەرگرت، پارتیش بەشداری کۆبوونەوەکەی نەکرد.

محەمەد کاکەیی، سەرۆکی فراکسیۆنی یەکێتی لە ئەنجومەنی پارێزگای نەینەوا ڕایگەیاندووە، ئەنجومەنی نوێی پارێزگای نەینەوا کۆبووەوە و گۆڕانکاری لە 20 پۆستدا کرد، لەو گۆڕانکارییەش، سەیدۆ خەیری بە قائیمقامی شەنگال دیاریکراو و یەکێتیش سێ پۆستی لە ئەنجومەنی پارێزگاکە وەرگرت.

ڕاشیگەیاند، پۆستەکانی یەکێتی بریتین لە قائیمقامی قەزای مەخمور کە دراوەتە سەردار سیامەند، پۆستی بەڕێوەبەری ناحیەی سنونێ دراوەتە داود جندی، ھەروەھا پۆستی بەڕێوەبەری ناحیەی وانکێ دراوەتە یاسر عەساف.

سەرۆکی فراکسیۆنی یەکێتی لە ئەنجومەنی پارێزگای نەینەوا دەشڵێت، پۆستەکان بەرکەوتەی ھەڵبژاردنن و بۆ یەکێتی بە دەنگدان یەکلاییکراونەتەوە.

ئەوەشی خستەڕوو، "فراکسیۆنەکانی پارتی و نەینەوا لئەھلیھا بەسەرۆکایەتی نەجم جبوری بەشدارییان لەکۆبوونەوەکەدا نەکردووە".

گۆڕانکارییەکانی ئەنجومەنی پارێزگای نەینەوا لەکاتێکدایە بۆیەکەم جار و دوای 33 ساڵ،یەکێتی پۆستی قائیمقامی مەخموری وەردەگرێت، بەڵام بەرپرسانی پارتی لەمەخمور ڕایانگەیاندووە ئەو پۆستە ڕادەست ناکەن.