هێزەکانی پێشمەرگە دەستیان بەخۆپیشاندانکرد

ناوەندی هەواڵ

هێزەکانی پێشمەرگەلە لیوای نۆ دژی دواکەوتنی مووچە و بێبەشکردنیان لە هاوکارییەکانی هاوپەیمانان گردبوونەوەی ناڕەزاییان ئەنجامدا.

ئەمڕۆ چوارشەممە3-7-2024، پێشمەرگەکانی لیوای نۆ لەسنووری ناحیەی تەیناڵ گردبوونەوەیەکی ناڕەزاییان ئەنجامدا و دەڵێن، بێبەشکراون لەو هاوکارییە داراییەی کە هاوپەیمانی نێودەوڵەتی پێشکەشی پێشمەرگەی دەکات.

لەچەند ڕۆژی ڕابردوودا وەزارەتی پێشمەرگە بڵاویکردەوە، کە بڕی 430 هەزار دینار وەک هاوکاری دارایی هاوپەیمانان دەدرێتە پێشمەرگە، بەڵام پێشمەرگەکانی لیوای نۆ کە ژمارەیان دوو هەزار پێشمەرگەیە دەڵێن ئەوانی نەگرتووەتەوە.

ئاماژەشیان بەوەدا لە ساڵی 2022 سێ مووچەیان فەوتاوە و لە دابینکردنی جلوبەرگی سەربازیش بێبەش کراون و داوایان کرد کێشەکانیان بۆ چارەسەر بکرێت.

هاوکات ، هەر بەپێی زانیارییەکان بەشێک لە هێزەکانی پێشمەرگە لە لیواکانی دیکەی پێشمەرگە لەسنووری سلێمانی ڕایانگەیاندووە خۆپیشاندان و ناڕەزایەتیی ئەنجام دەدەن بو داوا کردنی مووچەکانیان.