لە سلێمانى پارەى گەنمى جووتیاران دابەشدەکرێت

ناوەندی هەواڵ

بەڕێوەبەری سایلۆکانی سلێمانی رایگەیاند، دابەشکردنى پارەى گەنمى جوتیاران بەردەوامى هەیە و ئەمڕۆ کۆتا بەشى پارەى گەنمى ئەمساڵى جووتیاران دابەشدەکەین.

لە 15ی ئەم مانگەوە چەکی پارەی گەنمی جووتیارانی سنووری هەردوو پارێزگای سلێمانی و هەڵەبجە و ئیدارە سەربەخۆکانی گەرمیان و راپەڕین گەیشتبوو، بەڵام هەفتەیەک بوو بەهۆی کێشەیەک لە بەغدادەوە دابەشکردنی پارەکە دواکەوتبوو.

نەسرین ئەحمەد، بەڕێوەبەری سایلۆکانی سلێمانی راگەیاند،  بڕى ئەو پارەیەى بۆ گەنمى جووتیارانى ئەمساڵ بەدەستمان گەیشتبوو، 67 ملیار و 84 ملیۆن دینار بووە و ماوەى چەند رۆژێکە دەستیان بەدابەشکردنى کردووە و ئەمڕۆش دواین بەش دابەشدەکەین.

لەکۆى 577 ملیار و 500 ملیۆن دینار، بڕى 244 ملیار و 500 ملیۆن دینارى شایستەى گەنمى جووتیاران بۆ ئەمساڵ گەیشتووەتە هەرێمى کوردستان و بڕى 333 ملیار دینار هێشتا لەلایەن بەغدادەوە رەوانە نەکراوە.

ئەم ساڵ حکومەتی عێراق بڕیاری دا 700 هەزار تۆن گەنمی جووتیارانی هەرێمی کوردستان وەربگرێت؛ لە پارێزگاکانی سلێمانی و هەڵەبجە 282 هەزار و 660 تۆن، لە پارێزگای هەولێر 228 هەزار تۆن و لە پارێزگای دهۆکیش 189 هەزار تۆن.