کۆمیسیۆن داواى رادەستکردنى قوتابخانەکان دەکات

وەک ئامادەکارییەک بۆ بەڕێوەچوونى هەڵبژاردنى  پەرلەمانى کوردستان دەستەى هەڵبژاردنەکانى هەرێمى کوردستان داواى کردووە حەوت ڕۆژ خوێندنگەکانیان پێبدرێت.

نەبەرد عومەر، بەڕێوەبەرى دەستەى هەڵبژاردنەکانى هەرێمى کوردستان راگەیاند، لە 15ى ئەم مانگەوە لە خوێندنگەکان دەست بە ئامادەکاریى  دەکەن بۆ ئەنجامدانى هەڵبژاردن، لەکاتى دانانى خشتەى کاتی کارکردنى کۆمیسیۆن داوایان لە سەرۆکایەتیی هەرێم کردووە، خوێندنگەکانیان بۆماوەى حەوت رۆژ رادەستبکەن و ئەونیش رەزامەندییان پیشانداوە.

دەشڵێت، بەگوێرەى داواکارییەکەى کۆمیسیۆن لە رۆژى سێشەممە 15ى تشرینى یەکەم، دەوام لە قوتابخانەکان رادەگیرێت، تا رۆژى دووشەممە 21ى تشرینى یەکەم.

بڕیارە رۆژی 20ی ئۆکتۆبەری ئەمساڵ هەڵبژاردنى خولى شەشەمى پەرلەمانى کوردستان ئەنجام بدرێت، بە پێى ئامارەکانیش دوو ملیۆن و 899 هەزار و 578 کەس مافی دەنگدانیان هەیە لەکۆى ئەو ژمارەیەش دوو ملیۆن و 683 هەزار و 618ـیان دەنگدەری گشتی و 215 هەزار و 960ـیان دەنگدەری تایبەتن.