ئیسرائیل بە فەرمی داوای پتەوكردنی پەیوەندی لەگەڵ كورد دەكات

ناوەندی هەواڵ

وەزیری نوێی دەرەوەی ئیسرائیل داوا دەكات پەیوەندییەكان لەگەڵ هەردوو كۆمەڵگەی كوردی و دروزییەكان لە ڕۆژهەڵاتی ناوەڕاست بەرەوپێش ببرێن.

لە ڕێورەسمی ڕادەستكردنی دەسەڵاتی وەزیری دەرەوەی ئیسرائیل لە تەلئەبیب، یسرائیل كاتز دەسەڵاتەكانی ڕادەستی جەدعون ساعر وەزیری نوێی دەرەوەی ئیسرائیل كرد.

لە ڕێورەسمەكەدا جەدعون ساعر وەزیری نوێی دەرەوەی ئیسرائیل ڕایگەیاند: "پێویست دەكات پەیوەندی لەگەڵ نەتەوە و پێكهاتەكانی ناوچەكە پتەو بكەین، گەلی كورد گەلێكی گەورەیە، یەكێكە لەو گەلە گەورانەی نەیانتوانیوە ببنە خاوەنی دەوڵەتی سەربەخۆ، ئەوان بە سروشتی هاوپەیمانی ئێمەن".

وتیشی:"كوردەكان قوربانی سەركوتكاری ئێران و توركیان، پێویستە ئیسرائیل دەستیان بۆ درێژ بكات و پەیوەندی لەگەڵیان پتەو بكات، هەرچەندە ئەوە لێكەوتەی سیاسی و ئەمنیی هەیە".
وەزیری نوێی دەرەوەی ئیسرائیل دەشڵێت:"دەكرێت كەمینەی دروزەكان لە سوریا و لوبنان وەك هاوپەیمانی داهاتوو لێیان بڕوانرێت".

"پێویستە تێبگەین لە هەرێمێكدا كە كەمینە بین هاوپەیمانە سروشتییەكانیشمان دەبێت كەمینەكان بن، هەڵوێستی ئیسرائیل لەماوەی ساڵی ڕابردوودا نەگۆڕ بووە، سەركەوتنەكانیشی لەم جەنگانەی دواییدا دژ بە بەرەی ئێران وا دەكات ببێتە یاریكەرێكی نێودەوڵەتی و زیاتر گرنگ". ساعر جەدعون وای وت.