بۆ ئه‌وه‌ى ڕێگرى له‌ كۆچ بكات؛ به‌ریتانیا پاره‌ به‌ هه‌رێمى كوردستان ده‌دات

ناوەندی هەواڵ

به‌پێى هه‌واڵێكى ڕۆژنامه‌ى تایمزى به‌ریتانى، به‌مه‌به‌ستى ڕێگریكردن له‌ كۆچبه‌ران، به‌ریتانیا به‌ نیازه‌ پاره‌ بداته‌ هه‌رێمى كوردستان و توركیا و ڤێتنام له‌به‌رامبه‌ر ئه‌وه‌ى ڕێگرى بكه‌ن له‌ كۆچى هاوڵاتیانیان.
ڕۆژنامەی تایمزی بەریتانی بڵاوی كردووه‌ته‌وه‌: حكومەتی بەریتانیا دانوستانی لەگەڵ توركیا و ڤێتنام و بەرپرسانی هەرێمی كوردستان دەستپێكردووە، بۆ پێدانی پارە پێیان بە ئامانجی كەمكردنەوەی ڕۆیشتنی كۆچبەران بەرەو بەریتانیا.
وه‌ك  ئه‌و ڕۆژنامه‌یه‌ ده‌ڵێت: ئیڤێت كوپەر، وەزیری ناوخۆی بەریتانیا لە گفتوگۆدایە لەگەڵ ژمارەیەك حكومەتی وڵاتان، لەنێویاندا حكومەتی هەرێمی كوردستان و توركیا و ڤێتنام، سەبارەت بە هاوكاری و ڕێككەوتنی ئەمنی، كە دەكرێت پێش كۆتایی ئەمساڵ كۆتایی پێبهێنرێت.
هاوکات، كەیر ستارمەر، سەرۆكوەزیرانی بەریتانیا لە كاتی ڕۆیشتنی بۆ بەشداریكردن لە لوتكەی 20 لە بەرازیل ڕایگەیاند: كارێكی دروستە بۆ بەریتانیا كە خەڵك لە جێهێشتنی وڵاتەكانیان پەشیمان بكاتەوە، چونكە هەندێك جار بۆ پەڕینەوەیان لە كەناڵی ئینگلیز ژیانی خۆیان دەخەنە مەترسییەوە.
وتیشى: حكومەت پلانی هەیە بۆ ڕووبەڕووبوونەوەی ئەو باندە تاوانكاریانەی كە بەشدارن لە قاچاخچێتی بە خەڵكەوە.