یه‌كه‌م كۆبوونه‌وه‌ى په‌رله‌مان به‌ سه‌رۆكایه‌تى مه‌شهه‌دانى له‌سه‌ر بودجه‌یه‌

ناوەندی هەواڵ

 ئەنجومەنى نوێنەرانى عێراق رۆژى سێشەممەى ئه‌م هه‌فته‌یه‌، یەکەم کۆبونەوەى بە سەرۆکایەتیی مەشهەدانى ئەنجام دەدات دواى ئەوەى بۆماوەى نزیکەى ساڵێک دانیشتنەکان بە وەکالەت بەڕێوەدەبران.
بەپێی خشتەى کارى ئەنجومەنى نوێنەرانى عێراق، لە کۆبونەوەکەى رۆژى سێشەممەدا پێنج بڕگە تاوتوێ دەکرێن، کە گرنگترینیان هەموارکردنەوەى خشتەى بودجەى سێ ساڵى عێراقە، وه‌ك میدیاكانى عێراقیش ئاماژه‌ى پێده‌كه‌ن ئەم هەموارە پەیوەندى بە ماددەى پەیوەندیدار بە تێچووى هەر بەرمیلێکى نەوتى بەرهەمهاتووە لە هەرێمى کوردستان.
 هەر بەپێی خشتەکە، لە تەوەرێکى دیکەى کۆبونەوەکەدا دەنگدان لەسەر یاساى رێککەوتنى خزمەتگوزاریی گواستنەوەى ئاسمانیی نێوان حکومەتى عێراق و حکومەتى ڕووسیا دەکرێت.
 به‌وته‌ى میدیاكانى عێراق، ئەو یاسایانەى زۆرترین مشتومڕیان لەسەر بوە لە کارنامەى کۆبوونەوەى ئەنجومەنى نوێنەرانى عێراقدا نین وەک یاساى بارى کەسێتى و لێبوردنى گشتى و پرۆژەیاساى گەڕاندنەوەى ئەو موڵکانەى کە بڕیارەکانى ئەنجومەنى فەرماندەیی شۆڕش دەیانگرێتەوە.