مەزڵوم عەبدی گەڕایەوە ڕۆژئاوای کوردستان

ناوەندی هەواڵ

دوای کۆبوونەوەی لەگەڵ مەسعود بارزانی، مەزڵوم عەبدی، فەرماندەی گشتی هەسەدە گەڕایەوە بۆ ڕۆژئاوای کوردستان.

ئەمڕۆ پێنجشەممە، مەسعود بارزانی، لە هەولێر پێشوازیی لە مەزڵوم عەبدی، فەرماندەی گشتی هەسەدە کرد و کۆبوونەوە.

بەگوێرەی زانیارییەکان، ژەنەراڵ مەزڵوم کۆبانی، هەر ئەمشەو گەڕاوەتەوە بۆ ڕۆژئاوای کوردستان و دواتر بە تەلەفۆن لەگەڵ نێچیرڤان بارزانی، سەرۆکی هەرێم قسەی کردووە.

هەر بەگوێرەی زانیارییەکانی "ئیرادە"،  مەزڵوم عەبدی، بە هێلیکۆپتەرێکی ئەمریکی سەردانی هەولێری کردووە و بە هەمان هێلکۆپتەریش گەڕاوەتەوە.

لەلایەکی دیکەوە بەپێی هەواڵی میدیای هێزەکانی سوریای دیموکرات، ژەنەڕاڵ عەبدی سوپاسی  پشتیوانی مەسعود بارزانی کردووە و جەختی کردووەتەوە کە قۆناخی ئێستا پێویستی بە یەکخستنی هەوڵەکانی نێوان هەموو لایەنە کوردییەکان هەیە بۆ بەدیهێنانی سەقامگیری و دەستەبەرکردنی پاراستنی بەرژەوەندییەکانی گەلی کورد.

هۆشیار زێباری، ئەندامی مەکتەبی سیاسی پارتی دیموکراتی کوردستان ڕایگەیاند، "کۆبوونەوەی ئەمڕۆی نێوان مەسعود بارزانی و فەرماندەی گشتی هەسەدە لە هەولێر، دەستکەوتێکی گرنگە بۆ بەهێزکردنی یەکڕیزی و پێگەی کورد لە بەرامبەر دەسەڵاتدارانی نوێی سوریا لە دیمەشق بۆ ڕاگواستنێکی سیاسیی ئارام و دەشڵێت سوپاس بۆ هەموو هاوپەیمان و دۆستەکانمان".

پێشتر لەڕۆژی دووشەممە، 13ی کانوونی دووەم، د. حەمید دەربەندی، نوێنەری مەسعود بارزانی سەردانی ڕۆژئاوای کوردستان کرد و لە حەسەکە لەگەڵ مەزڵوم عەبدی، کۆبووەوە.