پەیامی مەزڵوم عەبدی لەبارەی کۆبوونەوەکەی لەگەڵ مەسعود بارزانی

ناوەندی هەواڵ

مەزڵوم عەبدى ڕاگەیەنراوێکى لەبارەى کۆبوونەوەکەى لەگەڵ بارزانى بڵاوکردەوە و دەڵێت، کۆبوونەوەکەمان مایەی دڵخۆشی بوو.

مەزڵوم عەبدى فەرماندەى هێزەکانى سوریاى دیموکرات،ئەمڕۆ هەینى لە تۆڕى کۆمەڵایەتى ئێکس ڕاگەیەنراوێکی بڵاوکردووەتەوە و ڕایگەیاندووە، لە کۆبوونەوەکە باسمان لەو پرۆسەی گۆڕانکارییە کرد، کە سوریا پێیدا تێدەپەڕێت، هەردوولاشمان جەختمانکردەوە، دەبێت کورد بۆ ئەم قۆناغە یەکگرتوو بێت.

دەشڵێت، باسمان لە گفتوگۆ لەگەڵ دیمەشقیش کردووە و جەختمان لە بەدەستهێنانى مافەکانى کورد لە سوریا کردووەتەوە.

مەزڵوم عەبدی ئاماژەی بەوەشکردووە، لە کۆبوونەوەکە جەختمان لە گرنگی یەکڕیزی کورد کردووەتەوە، سەقامگیری ناوچەیی بە گشتی لە ئەستۆی هەموومانە و لەو چوارچێوەیە هاوکارى یەکتر دەبین.

دوێنی پێنجشەممە 16ی1ی2025، مەسعود بارزانى و مەزڵوم عەبدى لە هەولێر کۆبوونەوە، کە کۆبوونەوەکە دواى سێ ڕۆژ لە سەردانى د. حەمید دەربەندی نوێنەرى بارزانى بۆ رۆژئاوای کوردستان هات.