تەنها لە یەك مانگدا 13 ڕۆژنامەنوسی كورد لە توركیا زیندانی كراون

ناوەندی هەواڵ

تا دێت فشارەكان بۆ سەر ئەو ڕۆژنامەنووسانە زیاتر دەكرێت كە بە دڵی ئاك پارتیی دەسەڵاتداری توركیا و هاوپەیمانەكانی نانوسن، بە پاساوی جیا جیا دەخرێنە زیندان.
ئاژانسی هەواڵی مێزۆپۆتامیا مانگی ڕابردوو بڵاوی كردەوە لە ماوەی پێنج ساڵدا لە ئاكامی هێرشەكانی توركیا بۆ سەر باشور و ڕۆژئاوای كوردستان 13 رۆژنامەنووسی كوردی شەهید بوون.
لە 17ـی كانونی دووەمی 2025، هێزە ئەمنییەكانی توركیا هەڵیان كوتایە سەر ماڵی ڕۆژنامەنووسان نەجلا دەمیر، ڕەحیمە كارڤار، ئەحمەد گونەش، وەلات ئەكین، وەدات ئۆروچ و ڕەیهان حاجیئۆغڵو. 
دوای وتە لێوەرگرتنیشیان لە سەرۆكایەتی داواكاری گشتی، دادگای سوڵحی ئێشكگر بە تۆمەتی "ئەندامبوون لە پەكەكە" هەر شەشیانی خستە زیندان.
هەروەها بە هۆی سەركۆنەكردنی كوشتنی ڕۆژنامەنووسان نازم داشتان و جیهان بیلگین كە ڕووماڵی هێرشەكانی توركیا و گروپە چەكدارەكانی توركیایان دەكرد لە ڕۆژئاوای كوردستان، 22ی كانونی یەكەمی 2024 حەوت ڕۆژنامەنووس دەستگیركران و بە بڕیاری هەمان دادوەر و بە پاساوی ئەوەی كە گوایە "پڕوپاگەندە بۆ پەكەكە دەكەن" و "دژی یاسا كارپێكراوەكانی توركیا دەوەستنەوە بۆ ڕێكخستنی خۆپیشاندان و گردبوونەوە" خرانە زیندان.