له‌پارێزگایه‌كى عێراق كاره‌سات ڕویدا.. ده‌یان زیندانى سوتێنران

ناوەندی هەواڵ

دواى بێده‌نگبونى حكومه‌تى عێراق له‌تاوانێكى مرۆیى گه‌وره‌ له‌یه‌كێك له‌گرتوخانه‌كانیدا، ده‌سته‌ى زانایانى موسڵمانى عێراق، په‌رده‌ى له‌سه‌ر تاوانه‌كه‌ هه‌ڵدایه‌وه‌، ده‌ڵێت:"له‌ڕوداوێكى نادیارو ته‌مومژاویدا، ده‌یان زیندانى له‌گرتوخانه‌یه‌كدا سوتێندراون".

به‌گوێره‌ى ڕاگه‌یه‌نراوێكى ده‌سته‌ى زانایانى موسڵمان له‌عێراق، لەگرتوخانەی ناسریه‌ کۆمەڵکوژییەک کراوە كه‌ تائێستا له‌عێراقدا شتى وا ڕوینه‌داوه‌.

ئه‌وه‌ش هاتوه‌، له‌و كۆمه‌ڵكوژیه‌دا كه‌ لەگرتوخانەی ناسریه‌ ئه‌نجامدراوه‌، 27 کەس لەزیندانییەکانی لەبارودۆخێکی نادیاردا سوتێنراون‌و تائێستاش تەرمەکانیان له‌پزیشكى دادەو حكومه‌تیش بێده‌نگەو هیچ لێكۆڵینه‌وه‌یه‌كى نه‌كردوه‌.

ده‌سته‌كه‌ جه‌ختیكردوه‌ته‌وه‌، له‌گرتوخانەکە بەئاشكراو نهێنیی، پێشێلكاریى مافى مرۆڤ ده‌كرێت، ده‌بێت لێكۆڵینه‌وه‌یان له‌سه‌ربكرێت‌و زۆرێكیش لەزیندانییەکان له‌ژێر دەسەڵاتی میلیشیاكانن.

له‌كۆتاییشدا ڕایگه‌یاندوه‌، ئەوەی لەگرتوخانەکانی عێراق بەئاشکراو نهێنی دەکرێت، لەهیچ شوێنکی دونیادا نییە.

له‌و ڕوه‌شه‌وه‌ داواكراوه‌، "داوا له‌هه‌موو ئه‌وكه‌سانه‌ ده‌كه‌ین كه‌ پشتیوانیی لەدەسەڵاتی سیاسیی عێراق دەکەن‌و دەرفەت بۆ حکومەتە یەک لەدوای یەکەکانی دەڕەخسێنن بۆ چەسپاندنی هەژمونی خۆیان بەسەر عێراقدا، بەهەڵوێستەکانیاندا بچنەوەو له‌ئاست ئه‌م تاوانانه‌ بێده‌نگ نه‌بن".