بڕیار له‌موچه‌ى مانگى شه‌ش ده‌درێت

ناوەندی هەواڵ

سه‌رچاوه‌یه‌كى ئاگادار له‌به‌غداوه‌ زانیاریى گرنگى له‌باره‌ى ڕێكه‌وتنه‌كانى هه‌ولێرو به‌غداوه‌ ئاشكراكردو ڕایگه‌یاند، "به‌غدا بڕیاریداوه‌ نه‌وتى به‌رهه‌مهێندراوى هه‌رێم هه‌رچه‌نده‌ وه‌ریبگرێت"، ده‌شڵێت:"دوشه‌ممه‌ یان سێشه‌ممه‌ موچه‌ ڕه‌وانه‌ ده‌كرێت".

سه‌رچاوه‌یه‌كى ئاگادار له‌به‌غداوه‌ زانیاریى گرنگى بۆ ئیراده‌ ئاشكراكرد سه‌باره‌ت به‌مووچه‌ى مووچه‌خۆرانى هه‌رێمى كوردستان‌و ڕایگه‌یاند، "سبه‌ینێ یان دوسبه‌ى ده‌ستده‌كات به‌ناردنه‌ ده‌ره‌وه‌ى نه‌وتى هه‌رێمى كوردستان".

ئه‌مڕۆش حه‌یان عه‌بدولغه‌نى وه‌زیرى نه‌وتى عێراق له‌شارى كه‌ركوكه‌وه‌ ئاشكرایكرد، كۆى به‌رهه‌مى نه‌وتى هه‌رێم بریتییه‌ له‌130 هه‌زار به‌رمیل نه‌وتى ڕۆژانه‌، بڕیاریشدراوه‌ 50 هه‌زارى بدرێته‌وه‌ به‌هه‌رێم‌و 80 هه‌زار به‌رمیله‌كه‌ى دیكه‌ وه‌ربگیرێت‌و ڕه‌وانه‌ى ده‌ره‌وه‌ بكرێت.

له‌وباره‌یه‌وه‌ سه‌رچاوه‌كه‌ى ئیراده‌ جه‌ختیكرده‌وه‌، "دواى وه‌رگرتنى نه‌وتى هه‌رێم له‌لایه‌ن كۆمپانیاى سۆمۆوه‌، دواتر دوو لیژنه‌ كه‌ له‌لایه‌ن ته‌یف سامیه‌وه‌ پێكهێندراوه‌، ڕاپۆرته‌كانى خۆى ئاماده‌ ده‌كات له‌باره‌ى خه‌رجى‌و داهاتى هه‌رێم له‌بودجه‌ى سێ ساڵى ڕابردودا كه‌ ئاخۆ چه‌ند بوه‌، ئه‌وه‌ لیژنه‌كه‌ یه‌كلای ده‌كاته‌وه‌".

به‌وته‌ى سه‌رچاوه‌كه‌، "ڕۆژى یه‌كشه‌ممه‌ وه‌زاره‌تى دارایی هه‌رێم 120 ملیار دینارى داهاتى ناوخۆ ڕه‌وانه‌ى به‌غدا ده‌كات".

جه‌ختیشیكرده‌وه‌، "ئه‌گه‌ر هیچ ڕێكه‌وتنێك ڕوو نه‌دات‌و نه‌وته‌كه‌ هه‌نارده‌ى ده‌ره‌وه‌ بكرێت، ئه‌وا به‌دڵنیاییه‌وه‌، ڕۆژى دوشه‌ممه‌ یان سێشه‌ممه‌ موچه‌ى فه‌رمانبه‌رانى هه‌رێم بۆ مانگى شه‌ش ڕه‌وانه‌ ده‌كرێت".