ئەنجومەنی وەزیرانی عێراق بڕیاری لەبارەی موچەی فەرمانبەرانی هەرێم نەدا

ناوەندی هەواڵ

ئەمڕۆ ئەنجوومەنی وەزیرانی عێراق کۆبووەوە، بەڵام هیچ بڕیارێکى لە بارەى خەرجکردنى موچەى موچەخۆرانى هەرێمى کوردستانەوە نەدا، ئەوەش بەهۆى ئەوەى ناکۆکییەکانى هەردوولا لەسەر داهاتى ناوخۆ و نەوت بەردەوامە.

ئەمڕۆ یەکشەممە 10ی ئابی 2025  ئەنجومەنی وەزیرانی عێراق بە سەرۆکایەتی محەمەد شیاع سودانی کۆبوونەوەی ئاسایی هەفتانەی خۆی ئەنجامدا.

لە کۆبوونەوەکەدا بڕیاردرا رۆژی پێنجشەممە بکرێتە پشووی رەسمی، هەروەها بڕیار لەبارەی مامەڵەکردن بە خانووە زیادەڕەوەکان درا.

هەرچەندە چاوەڕواندەکرا لە کۆبوونەوەکەی ئەمڕۆدا بڕیار لەبارەی ناردنی موچەی مانگی شەشی هەرێم بدرێت، بەڵام کۆبوونەوەکە بێ باسکردنی ئەو بڕگەیە کۆتاییهات.

لێکتێگەیشتنى نێوان حکومەتى هەرێمى کوردستان و حکومەتى فیدراڵ رۆژی 16ی تەمموز لەلایەن هەردوولاوە پەسەندکرا، بڕیاربوو رۆژانە حکومەتى هەرێمى کوردستان 230 هەزار بەرمیل نەوت و نیوەى داهاتى ناوخۆ رادەستى حکومەتى فیدراڵ بکات، لەبەرامبەریشدا حکومەتى فیدراڵ مووچەى هەرێمى کوردستان خەرجبکات.

لەبەرامبەر خەرجکردنى مووچەى مانگى پێنج، هەرێم بڕى 120 ملیار دینار لە داهاتى ناوخۆ نارد، بەڵام نەوت رادەستنەکرا، هۆکارەکەشى بۆ هێرشە درۆنییەکان گەڕێندرایەوە و بەرپرسانى حکومەت باسیان لەوەکرد، بەرهەمهێنانى نەوت کەمبووەتەوە.