ڕوسیا هێزى زیاتر دەباتە ڕۆژئاواى کوردستان

ناوەندی هەواڵ

تەلەفزیۆنی سوریا لەزارى سەرچاوەیەکی ئاگادارەوە ئاشکرایکردوە، هێزەکانی ڕوسیا بەچەند قۆناغێک بنکەکانى خۆیان لەفڕۆکەخانەی قامیشلۆى ڕۆژئاواى کوردستان بەهێزترکردوە، لەوانە نۆژەنکردنەوەی ئەو شوێنەی کە فڕۆکە ڕوسیەکانی تێدا جێگیربوەو فراوانکردنی شوێنی نیشتەجێبونی سەربازو ئەفسەرەکانیان لەناوەندەکانی بەردەم بینای سەرەکی فڕۆکەخانەکە.

ڕۆژى دوشەممە تەلەفزیۆنی سوریا گرتە ڤیدیۆییەکى تایبەتی هێزەکانی ڕوسیای دەستکەوتوە کە دەوری فڕۆکەکانیان بەهێزى زیاتر توندوتۆڵ دەکەن لەنزیک جێگیرکردنی ڕادارەکان لەناو فڕۆکەخانەکەدا، بەربەستیان داناوەو دەروازەی چونە ژورەوەیان فراوانترکردوەو ئاڵای ڕوسیایان بەسەر بینای فڕۆکەخانەکەدا هەڵکردوە.

بەگوێرەی ئەو سەرچاوەیە، دوو فڕۆکەی بارهەڵگری ڕوسی بەبەردەوامی لەنێوان فڕۆکەخانەی قامیشلۆو بنکەی ئاسمانی حمەیمیمدا دەسوڕێنەوەو سەربازو کەرەستەی لۆجستی‌و کەرەستەی سەربازیی دەگوازنەوە بۆ فڕۆکەخانەی قامیشلۆ.

دەشڵێت، "ئەم ئۆپەراسیۆنانە بەشێوەیەکی گشتیی یان لەبەیانیان یان لەشەودا ئەنجامدەدرێن بۆ ئەوەی سەرنج‌و چاوی میدیاکان لەسەر جوڵەکانیان نەبێت".

سەرچاوەکە باسی لەوەشکردوە، ژمارەی سەربازانی ڕوسیا لەفڕۆکەخانەکە بەراورد بەپێش ڕوخانی ئەسەد، کەمیکردوە، بەڵام ڕوسیا لەمانگی ڕابردوەوە دەستی بەو جوڵانە کردوە.

سەرچاوەکە پێشبینیکردوە، لەئێستادا نزیکەی 200 سەربازی ڕوسی لەفڕۆکەخانەی قامیشلۆ جێگیرکرابن.