10 بانكى عێراق قەرزى خەڵكیان بۆ نادرێتەوەو مایەپوچ بون

رۆژنامەى "سەباح"ى عێراقى كە رۆژنامەى فەرمى دەوڵەتە، لە هەواڵێكى دا ئەوەى ئاشكراكردوە كە بانكى ناوه‌ندى به‌گوێره‌ى پێوه‌ره‌ نێوده‌وڵه‌تییه‌كان چاكسازيى له‌ بانكه‌كان ده‌كات و نزیكەى 10%ى بانكەكانيش لە پلانى چاكسازیى دەترسن.

رۆژنامەكە لێدوانێكى عەلى عەلاق پارێزگارى بانكى ناوه‌ندى عێراقى بڵاوكردۆتەوەو ناوبراویش ئاماژەى بەوەداوە كە هاوڵاتییانى عێراق بە هیچ جۆرێك متمانەیان بە سیستمى بانكیى نییە، بۆیە لە ئێستادا 10 بانكى عێراقی قەرزى خەڵكیان بۆ نادرێتەوەو مایەپوچ بون.

عەلاق، لە لێدوانەكەى دا ئەوەشى خستۆتەڕو كە  ئەو دە بانكە بەهۆى ئەوەى نەیانتوانیوە قەرزى خەڵك بدەنەوە لەژێر پاكتاوكردندان.

هاوكات پارێزگارى بانكى ناوه‌ندى عێراقى وتوشیەتى: به‌ڵگه‌نامه‌ى چاكسازیى بانكیى بۆ ساڵى 2025  هه‌نگاوێكى ستراتیژییه‌ بۆ به‌هێزكردنى متمانه‌ به‌ سیستمى بانكى عێراق و چاره‌سه‌ركردنى كه‌موكوڕییه‌كان، چونكه‌ 80% ى دراوى عێراق له‌ ده‌ره‌وه‌ى بانكه‌كانه‌، ئەمەش ئەو راستییە دەسەلمێنێت كە خەڵك متمانەى بە بانكة عێراقییەكان نەماوە.