بانكەكانى هەژمارى من مەرجیان بەسەردا دەسەپێنرێت

هەژمارى من كە تاكە هەژمارى بێپارەیە لە جیهاندا، مەرج بۆ ئەو بانكانە دادەنێت كە دەیانەوێت بەشداربن لە "خزمەتگوزارییەكان"ى ئەو هەژمارەدا، ئەگەرچى هیچ خزمەتگوزارییەكى نییە.

لەمبارەیەوە سەرچاوەیەك لە نوسینگەى سەرۆكوەزیرانى هەرێمەوە ئەوەى ئاشكراكرد كە هەر بانكێك بیەوێت بەشداربێت لە پرۆسەى بەدیجیتاڵكردنی موچەى فەرمانبەران و مامۆستایانى هەرێم دەبێت چەند مەرجێكى تێدابێت.

سەرچاوەكە سەبارەت بە مەرجەكان وتى:  مەرجە سەرەكییەكانی هەژماری من، بریتین لە:

یەكەم: دەبێت هەر بانكێكى بەشداربو بڕى پێویست لە ئامێرى "ئى تى ئێم"ى هەبێت، سەرەڕاى لقی پێویست لە شارەكان.

دوەم: پێویستە كۆمەڵێك مەرجى تەكنیكى تێدابێت، لەوانە: پەیوەست بن بە سیستمى بانكى جیهانییەوە، هاوكات دیجیتاڵى بن.

سێهەم: دەبێت پێشوەختە رەزامەندیى بانكى ناوەندیى عێراقی وەرگرتبێت.

چوارەم: نابێت موچە لەرێى دەروازەكانى راكێشانى پارە بێت "منفذ"، چونكە پرۆژەكە رێگەى پێنادات و یەكێكە لە رێنماییەكانى بانكى ناوەندى.

جێى ئاماژەیە، هەژمارى من، یەكێكە لە پرۆژە خراپەكانى حكومەتى هەرێم بە بەراورد بە  نوسینگەكانى بازاڕى دراوى شارەكانى هەرێم؛ دەردەكەوێت نوسینگەكان زۆرمتمانەپێكراو ترو پڕ پارە ترن و موچەخۆران بە زۆر پێیان پڕدەكرێتەوەو ئارەزوى لێناكەن.