نەبیل مەرسومی: رێككەوتنی بەغدا و هەولێر لەسەر نەوت دەرزی سڕكەرە بەفەرمانبەرانی هەرێم دەدرێت

ناوەندی هەواڵ

پسپۆڕێكی ئابوری عێراق دەڵێت: رێككەوتنی ئەم دواییەی نێوان بەغدادو هەولێر، حەبی ڤالیۆم و دەرزی سڕكەڕی نوێیە بە فەرمانبەرانی هەرێم دەدرێت، چونكە بە بێ‌ دانوستان لەگەڵ كۆمپانیا بیانیەكان، ناكرێت هەرێم و بەغداد بگەنە رێككەوتن.

نەبیل مەرسومی، لە چاوپێكەوتنێكدا لەگەڵ كەناڵی "العهد" وتی: هەرێمی كوردستان بە فیعلی خاوەنی نەوت نییە، ئەوەی خاوەنی نەوتە كۆمپانیا بیانیەكانن، كە گرێبەستی هاوبەشی و بەشكردنی بەرهەمهێنانیان هەیە.

وتیشی: ئەو كۆمپانیا بیانیانە پارەیان خەرجكردووەو وەبەرهێنانیان لەڕێی 57 گرێبەستەوە كردووە بۆ شوێنە پشكنراوەكان و كێڵگەكانی نەوت، ئەوان بەرهەمهێنان و تێچوو و هەناردەكردن دیاریدەكەن.

مەرسومی راشیگەیاندووە، كاتێك بەرهەمهێنان دەگاتە ئەو قۆناغەی كە پێی دەوترێت بەرهەمهێنانی بازرگانی، ئەو كۆمپانیا بیانیانە 40% بەهای داهاتەكان دەبەن لەوەی پێیدەوترێت تێچوی نەوت، لەگەڵ 20بۆ 30 لەسەدی لە قازانجی نەوت.