هەنت ئۆیڵ دەستيكردەوە بەبەرهەمهێنانى نەوت لەكێڵگەكانى هەرێم

کۆمپانیای "هەنت ئۆیل"ی ئەمریکی، دەستپێکردنەوەی کارەکانی بەرهەمهێنانى نەوتی لە كێڵگەكانى هەرێمی کوردستان دوپاتکردەوە و پێشبینيش دەکات تا کۆتایی ئەم مانگە بەرهەمهێنانی نەوت بگەڕێتەوە ئاستی ئاسایی خۆى.

لەمبارەیەوە وتەبێژی فەرمى کۆمپانیاکە بە ئاژانسی "ڕۆیتەرز"ی ڕاگەیاندوە، دەستپێکردنەوەی بەرهەمهێنانی نەوت دوای نزیکەی مانگێک دێت لە هێرشى ئەو درۆنانەى یەکێک لە کێڵگە نەوتییەكانی "پارێزگای دهۆک"یان كردە ئامانج.

وتەبێژى فەرمى كۆمپانیاكە راشیگەیاندوە،  ئێستا هەوڵەكان بۆ گەڕاندنەوەی توانای بەرهەمهێنانی تەواو لە كێڵگەكانى سنورى كاركردنى كۆمپانیاكەمان لە ئارادایە.

ئەم ڕاگەیاندنەی کۆمپانیای هەنت ئۆیل هاوکاتە لەگەڵ هەنگاوی هاوشێوەی کۆمپانیاکانی دیکە، لەوانە کۆمپانیای "دی ئێن ئۆ"ی نەرویجى؛ کە بەهەمان شێوە دەستیپێکردنەوەی کارەکانی دوای وەستانێكى کاتیی بەهۆی هێرشەکانی ئەم دواییە؛ لە بەشێک لە کێڵگە نەوتییەکانی کوردستان ڕاگەیاند.

جێى ئاماژەیە، کێڵگە نەوتییەکانی هەرێمى كوردستان لە ماوەی مانگی تەمموزدا زیاتر لە 20 جار لەلایەن فڕۆکەی بێفڕۆکەوانەوە هێرشیان کراوەتە سەر و بەگوێرەی وتەى لایەنە ئەمنییەکان، لەكاتى هێرشەكان دا كاركردن لەو كێڵگانە بەشێوەیەكى تەواوەتى راگیرابون، هاوكات ئەم هێرشانە زیانی ماددی و دابەزینی بەرچاوی بەرهەمهێنانی نەوتی لێکەوتەوە.