ئه‌مشه‌و شاندێك بۆ موچه‌ ده‌چێته‌وه‌ به‌غدا

ناوەندی هەواڵ

بڕیارە ئەمشەو شاندێکی هەرێم به‌مه‌به‌ستى كۆبونه‌وه‌ له‌گه‌ڵ وه‌زیرو وه‌زاره‌تى دارایى عێراق سه‌ردانى به‌غدا بكاته‌وه‌، به‌گوێره‌ى چه‌ند زانیارییه‌كیش، ئه‌گه‌رى ئه‌وه‌ هه‌یه‌، خودى وه‌زیرى دارایی هه‌رێم سه‌رۆكایه‌تى شاندى هه‌رێم بكات.

ئەنجوومەنی وەزیرانی عێراق سێشه‌ممه‌ى هه‌فته‌ى ڕابردوو، بڕیاری خەرجکردنی موچەی مانگی شەشی فەرمانبەرانی هەرێمى ده‌كرد، بەڵام تائێستا بڕیارەکە نەچوەتە بواری جێبەجێکردنەوە، له‌و ڕوه‌شه‌وه‌ ئەمشەو شاندێک لەهەولێرەوە ده‌چێتە بەغدا.

زانیارییه‌كان ئاماژه‌ به‌وه‌ده‌كه‌ن، ئامانجی سەرەکیی سەردانی شانده‌كه‌ى هه‌رێم، بۆ گفتوگۆى چڕوپڕه‌ له‌باره‌ى خاڵە ناکۆکه‌كانى هه‌ولێرو به‌غدا تایبه‌ت به‌پرسى موچه‌و نه‌وتى هه‌رێمى كوردستان.

هه‌روه‌ك سه‌رچاوه‌یه‌كى وه‌زاره‌تى دارایی بۆ ئیراده‌ ده‌ڵێت:"پرسێك كه‌ ئه‌م شانده‌ى هه‌رێم سبه‌ینێ له‌به‌غدا تاووتوێى ده‌كات، داهاتى ناوخۆى هه‌رێمه‌و له‌سه‌ردانى پێشویاندا شانده‌كه‌ى هه‌رێم به‌وه‌زیرى داراییان وتوه‌، ناتوانن بۆ مانگى 7ى مانگه‌كانى دیكه‌ بڕى 120 ملیار دینار بده‌ن به‌به‌غدا".

سه‌رچاوه‌كه‌ ده‌ڵێت:"ئەگەر حکومەتی هەرێم مەرجەکان جێبەجێ بکات، ئەوا ڕۆژی سێشەممەی داهاتوو بڕیاری ناردنی پارەکە دەدرێت‌و ڕۆژی چوارشەممە یان پێنجشەممە موچەى موچه‌خۆران ڕه‌وانه‌ى هه‌رێم ده‌كرێت".

هه‌روه‌ك ماوه‌ى زیاتر له‌حه‌وت ڕۆژه‌، حکومەتی هەرێم ڕایگه‌یاندوه‌، بڕى 120 ملیار دیناری داهاتی ناوخۆ ئامادەیەو هەر کاتێک بەغدا داوای بکات، ڕادەستی دەکەن، به‌ڵام تائێستا ڕاده‌ستنه‌كراوه‌.