سەرۆکی پەرلەمانی تورکیا جەخت لەسەر پرۆسەی "چەک دانان" دەکاتەوە

ئیرادە میدیا

نوعمان کورتولموش، سەرۆکی پەرلەمانی تورکیا، لە میانەی کۆبوونەوەیەکدا لەگەڵ سەرنووسەری ژمارەیەک دەزگای ڕاگەیاندنی ناوخۆ، ڕوونکردنەوەیەکی توند و بەرچاوی لەبارەی ئەو پرۆسە سیاسییەی ئێستای نێوان دەوڵەت و پەکەکە خستەڕوو، و جەختی لەوە کردەوە کە ئەمە "پرۆسەی ئاشتی نێوان کورد و تورک" نییە، بەڵکو "پرۆسەیەکە لەلایەن پەرلەمانەوە بە چڕی چاودێری دەکرێت" و بە هیچ شێوەیەک دانوستان لە ئارادا نییە.

کورتولموش ڕایگەیاند: ئەم پرۆسەیە لە ڕاستیدا بە دەستپێشخەری پەکەکەوە دەستیپێکردووە کە "نیازی خۆیان بۆ دانانی چەک ڕاگەیاندووە" و دووپاتی کردەوە"هیچ دانوستانێک لە نێوان ئەو ڕێکخراوە و دەوڵەتدا نەبووە و هەرگیزیش نابێت.

کورتولموش ئەوەشی خستەڕوو: ئەگەر ئەنجومەنی ئاسایشی نیشتیمانی بڕیار بدات کە پارتی کرێکارانی کوردستان (پەکەکە) ئیتر "ڕێکخراوێکی چەکداری نەماوە"، ئەوە بنەمایەکی یاسایی بەهێزتر بۆ پڕۆسەکە دروست دەکات.

کورتولموش جەختی لەسەر ئاسانکاریی ئەو پرۆسەیە کردەوە و وتی: داڕشتنی یاسا ئاسانە؛ نوێنەری هەموو لایەنەکان ئامادە دەبن، خاڵی هاوبەش دەدۆزرێتەوە و دەتوانین هەر یاسایەک لە ماوەی سێ بۆ پێنج ڕۆژدا دەربکەین.