له‌توركیا چى ڕوو ده‌دات؟ گه‌ریلاكانى په‌كه‌كه‌ چییان به‌سه‌ردێت؟

ئاژانسی هەواڵی ڕۆیتەرز بڵاویكردەوە، پەرلەمانی تورکیا دەستیکردوە بەداڕشتنی یاسایەک کە ڕێگە بەهەزاران گەریلاو هاوڵاتی مەدەنی پارتی کرێکارانی کوردستان (پەکەکە) دەدات لەحەشارگەکانیان لەباکوری عێراق بگەڕێنەوە بۆ ماڵ‌و حاڵی خۆیان، ئەوەش لەچوارچێوەی دانوستانەکان بۆ کۆتاییهێنان بەململانێیەکی درێژخایەن.

بەرپرسێکی باڵا لەڕۆژهەڵاتی ناوەڕاست‌و سەرچاوەیەکی ناو پارتێکی سیاسی کوردی لەتورکیا بەڕۆیتەزیان ڕاگەیاندوە، یاسا پێشنیازکراوەکە پارێزگاری لەگەڕاوەکان دەکات، بەڵام لێبوردنی گشتیی ئەو تاوانانە ناگرێتەوە کە لەلایەن چەکدارانی پێشوەوە ئەنجامدراون، هەروەها بەگوێرەی ئەو پلانانە، دەکرێت هەندێک لەسەرکردەكانی گەریلا بنێردرێن بۆ وڵاتانی سێیەم.

بەپێی زانیارییەکانی ئاژانسەکە، پڕۆژەیاساکە پارێزگاری لەگەڕاوەکان دەکات، بەڵام لێبووردنی گشتیی بۆ ئەو تاوانانە ناگرێتەوە کە ئەندامانی پێشووی پەکەکە ئەنجامیان داون، چاوەڕواندەکرێت پڕۆژەیاساکە لەم مانگەدا پێشکەشی پەرلەمان بکرێت.

لەقۆناغی یەکەمدا، پێشبینیدەکرێت نزیکەی هەزار کەس بگەڕێنەوە، ئەویش ئەو ئەندامانەن بەشدارییان لەکاری چەکداریدا نەکردووە.

لیژنەیەکی پەرلەمانی تایبەت بەپرۆسەی چارەسەری، ئەرکی ئامادەکردنی نەخشەڕێگایەکی بۆ تێکەڵبوونەوەی کۆمەڵایەتی ئەندامانی پەکەکە لەئەستۆگرتووە.

یاسای "گەڕانەوە بۆ ماڵەوە" چوار پۆلێنی جیاواز بۆ گەڕاوەکان دەکات، دۆخی ئەندامانی تێوەگلاو لەتاوان، ئەندامانی تێوەنەگلاو، بەرپرسانی ڕێکخراوەکەو فەرماندەرەکان.

ئەم هەنگاوە بەشێکە لەپڕۆسەیەکی ئاشتی فراوانتر بۆ کۆتاییهێنان بەململانێیەکی درێژخایەن، ململانێیەک بووەتە هۆی گیانلەدەستدانی نزیکەی 40 هەزار کەس.

پرۆسەی نوێی ئاشتی لەتورکیا دوای دەستپێشخەرییەکەی دەوڵەت باخچەلی، سەرۆکی مەهەپە، لەکۆتایی ساڵی ڕابردوودا دەستیپێکرد.

دوای زنجیرەیەک کۆبوونەوە، عەبدوڵڵا ئۆجەلان ڕێبەری پەکەکە، لەمانگی شوباتی ئەمساڵدا داوای لەپارتەکەی کرد کۆنگرە ببەستێت‌و کۆتایی بەخەباتی چەکداری بهێنێت، لەوەڵامدا، پەکەکە لەمانگی ئایاردا کۆنگرەی خۆی ئەنجامداو بڕیاری خۆهەڵوەشاندنەوەو چەکدانانیدا.

هەروەها لەمانگی تشرینی یەکەمدا، پەکەکە کشانەوەی تەواوەتی هێزەکانی لەخاکی تورکیا ڕاگەیاند، ئەم هەنگاوانە لەلایەن بەرپرسانی تورکیاوە بە"ئەرێنی‌و مێژوویی" وەسفکران.