بارزانی مەرجی پارتی بۆ پێکهێنانی حکومەت ئاشکراده‌كات

ئەمڕۆ یەکشەممە مەسرور بارزانی سه‌رۆك وه‌زیرانى هه‌رێم باس له‌پێکهێنانی حکومەتی نوێ عێراق‌و هەرێمی کوردستان ده‌كات‌و ڕایده‌گه‌یه‌نێت، "گفتوگۆکان نەوەستاون، دوای هەڵبژاردنی پەرلەمانی عێراق، هەلومەرجی نوێ هاتوه‌تە پێش"، ده‌شڵێت، "هیوادارم بتوانین حکومەتێک پێکبهێنین".

مه‌سرور بارزانى سه‌رۆك وه‌زیرانى هه‌رێم لەبارەی پێکهێنانی کابینەی 10ی هه‌رێم ڕایگه‌یاند، "گفتوگۆکان نەوەستاون، دوای هەڵبژاردنی پەرلەمانی عێراقیش هەلومەرجی نوێ هاتوه‌تە پێش، لەسەر ئەو بنەمایە ئێمە لە گفتوگۆ بەردەوامدەبین، هیوادارم بتوانین حکومەتێک پێکبهێنین لەئاست متمانەی خەڵک بێت‌و بۆ بەرژەوەندیی خەڵکی کوردستان بێت".

لەبارەی پێکهێنانی حکومەتی عێراق‌و دانانی سەرۆک وەزیرانی نوێی عێراق، بارزانی وتى، "دوای هەڵبژاردن هێزی پارتی لەسەر ئاستی کوردستان‌و هەموو عێراق دەرکەوت، زۆر ئاساییە هەمولایەک ڕوو لەپارتی بکات‌و داوای یارمەتی بکات، ئێمە وەکو لایەنێکی بەشدار لەحکومەت بەرنامەو مەرجی ئێمە ئەوە دەبێت ئەجێندانی حکومەت چییە لەجێبەجێکردنی ئەو مادە دەستورییانەی بۆ هەموو عێراق گرنگن بەتایبەت بۆ هەرێمی کوردستان".

جه‌ختیشده‌كاته‌وه‌، "بۆ ئێمە ئەجێندای حکومەتی داهاتوو زۆر زۆر گرنگە".